കൊച്ചി: ഇന്ത്യയിലെ ക്രെഡിറ്റ് കാർഡ് വിപണിയിൽ സാന്നിധ്യം ശക്തമാക്കുന്നതിന്റെ ഭാഗമായി ആഗോള ബാങ്കിങ് ഭീമനായ സ്റ്റാൻഡേർഡ് ചാർട്ടേഡ് ബാങ്കിന്റെ ക്രെഡിറ്റ് കാർഡ് ബിസിനസ് ഏറ്റെടുക്കാൻ ഫെഡറൽ ബാങ്ക് ഒരുങ്ങുന്നു (Federal Bank). ഇതുസംബന്ധിച്ച കരാറിൽ ഏർപ്പെടാൻ ഫെഡറൽ ബാങ്ക് ഡയറക്ടർ ബോർഡ് അംഗീകാരം നൽകി. രാജ്യത്തെ പ്രമുഖ നഗരങ്ങളിലെ സമ്പന്നരായ ഇടപാടുകാരിലേക്ക് ബാങ്കിന്റെ സേവനം വ്യാപിപ്പിക്കാൻ ഈ നീക്കം സഹായിക്കും.
21 ലക്ഷം കാർഡുകളുമായി ഫെഡറൽ ബാങ്ക് കുതിക്കുന്നു
നിലവിൽ 21 ലക്ഷം ക്രെഡിറ്റ് കാർഡുകൾ പ്രചാരത്തിലുള്ള ഫെഡറൽ ബാങ്ക്, ഈ ഏറ്റെടുക്കലിലൂടെ സ്റ്റാൻഡേർഡ് ചാർട്ടേഡിന്റെ 4.50 ലക്ഷം കാർഡുകൾ കൂടി സ്വന്തമാക്കും. ഇതിൽ 75 ശതമാനവും ഇന്ത്യയിലെ എട്ട് മുൻനിര നഗരങ്ങളിൽ നിന്നുള്ളവയാണ്. റീട്ടെയ്ൽ ക്രെഡിറ്റ് രംഗത്തെ വളർച്ചയും മികച്ച ക്രെഡിറ്റ് ഹിസ്റ്ററിയുള്ള പുതിയൊരു വിഭാഗം ഇടപാടുകാരെ ലഭിക്കുന്നതും ബാങ്കിന് വലിയ നേട്ടമാകുമെന്ന് ഫെഡറൽ ബാങ്ക് എംഡിയും സിഇഒയുമായ കെ.വി.എസ്. മണിയൻ പറഞ്ഞു.
2026-ഓടെ നടപടികൾ പൂർത്തിയാകും
ഇന്ത്യയെ ഒരു പ്രധാന വിപണിയായി കാണുന്ന സ്റ്റാൻഡേർഡ് ചാർട്ടേഡ്, തങ്ങളുടെ വെൽത്ത് മാനേജ്മെന്റ് വിഭാഗത്തിൽ കൂടുതൽ ശ്രദ്ധ കേന്ദ്രീകരിക്കുന്നതിന്റെ ഭാഗമായാണ് ഈ കൈമാറ്റം നടത്തുന്നത്. ഇടപാടുകാർക്ക് സുഗമമായ മാറ്റം ഉറപ്പാക്കാൻ ഇരു ബാങ്കുകളും ചേർന്ന് പ്രവർത്തിക്കുമെന്ന് സ്റ്റാൻഡേർഡ് ചാർട്ടേഡ് ഇന്ത്യ ആൻഡ് സൗത്ത് ഏഷ്യ റീട്ടെയ്ൽ ബാങ്കിങ് വിഭാഗം ഹെഡ് ആദിത്യ മൻലോയ് വ്യക്തമാക്കി. 2026 അവസാനത്തോടുകൂടി ഏറ്റെടുക്കൽ നടപടികൾ പൂർത്തിയാക്കാനാണ് ലക്ഷ്യമിടുന്നത്.
Story Summary: Federal Bank is set to acquire the credit card business of Standard Chartered Bank in India, a move approved by its board to strengthen its retail credit portfolio. The acquisition involves 4.50 lakh credit cards, primarily from major Indian cities, and is expected to be completed by the end of 2026.
