കൊച്ചി: നടൻ ചെമ്പൻ വിനോദുമായുള്ള ആറ് വർഷത്തെ മനോഹരമായ യാത്രയെക്കുറിച്ചാണ് മറിയം തോമസ് ഇൻസ്റ്റഗ്രാമിൽ കുറിച്ചത് (Chemban Vinod Jose Mariam Thomas). സൈക്കോളജിസ്റ്റായ മറിയം കോട്ടയം സ്വദേശിയാണ്.
“ആറ് വർഷങ്ങൾ, എണ്ണമറ്റ ഓർമ്മകൾ. ഇപ്പോഴും എനിക്ക് ഏറ്റവും പ്രിയപ്പെട്ടയാൾ നീ തന്നെ. പ്രണയത്തിലും ചിരിയിലും നമ്മുടെ എല്ലാ കുസൃതി നിറഞ്ഞ സാഹസങ്ങളിലും എന്റെ കൂടെയുള്ള പങ്കാളി. നമുക്കായി… എന്നെന്നേക്കും എപ്പോഴും. വിവാഹവാർഷികാശംസകൾ ചെമ്പോസ്കാ,” എന്നാണ് ഇരുവരും ഒന്നിച്ചുള്ള ചിത്രം പങ്കുവെച്ച് മറിയം കുറിച്ചത്.
2020-ലെ ലോക്ഡൗൺ കാലത്തായിരുന്നു ചെമ്പൻ വിനോദിന്റെയും മറിയത്തിന്റെയും വിവാഹം. വളരെ ലളിതമായി നടന്ന ചടങ്ങിൽ അടുത്ത ബന്ധുക്കൾ മാത്രമാണ് പങ്കെടുത്തത്. വിവാഹസമയത്ത് ഇരുവരും തമ്മിലുള്ള പ്രായവ്യത്യാസത്തെച്ചൊല്ലി സോഷ്യൽ മീഡിയയിൽ വലിയ രീതിയിലുള്ള വിമർശനങ്ങൾ ഉയർന്നിരുന്നു. എന്നാൽ അത്തരം നെഗറ്റീവ് കമന്റുകളെയെല്ലാം അവഗണിച്ചുകൊണ്ട് സന്തോഷകരമായ ദാമ്പത്യജീവിതം നയിക്കുകയാണ് ഈ ദമ്പതികൾ.
2010-ൽ ലിജോ ജോസ് പെല്ലിശ്ശേരിയുടെ ‘നായകൻ’ എന്ന ചിത്രത്തിലൂടെ സിനിമയിലെത്തിയ ചെമ്പൻ വിനോദ്, പിന്നീട് ആമേൻ, ഈ.മ.യൗ, ജല്ലിക്കട്ട്, പൊറിഞ്ചു മറിയം ജോസ് തുടങ്ങിയ ചിത്രങ്ങളിലൂടെ സ്വതസിദ്ധമായ അഭിനയശൈലി കൊണ്ട് മലയാളികളുടെ പ്രിയങ്കരനായി മാറി. ‘അങ്കമാലി ഡയറീസ്’ എന്ന ചിത്രത്തിലൂടെ തിരക്കഥാകൃത്തെന്ന നിലയിലും അദ്ദേഹം തന്റെ മികവ് തെളിയിച്ചിട്ടുണ്ട്.
വിവാഹവാർഷിക ദിനത്തിൽ താരത്തിന് ആശംസകളുമായി നിരവധി സഹപ്രവർത്തകരും ആരാധകരും പോസ്റ്റിന് താഴെ എത്തുന്നുണ്ട്.
Story Summary: Actor Chemban Vinod Jose and his wife Mariam Thomas are celebrating their 6th wedding anniversary. Mariam, a psychologist from Kottayam, shared a loving note on social media calling Chemban her “favorite person” and partner in all adventures. Married in 2020 during the lockdown, the couple had faced social media scrutiny regarding their age gap but continue to share a strong bond.
