ലോസ് ആഞ്ചലസ്: പ്രശസ്ത ഇൻഡി പോപ്പ് ഗായകൻ ഡി4വിഡ് കൊലപ്പെടുത്തിയെന്ന് ആരോപിക്കപ്പെടുന്ന 14 വയസ്സുകാരി സെലസ്റ്റ് റിവാസ് ഹെർണാണ്ടസിന്റെ മരണകാരണം പുറത്ത് (D4vd David Burke Murder Case). ശരീരത്തിൽ തുളച്ചുകയറിയ മാരകമായ ഒന്നിലധികം മുറിവുകളാണ് മരണകാരണമെന്ന് ബുധനാഴ്ച പുറത്തുവിട്ട മെഡിക്കൽ എക്സാമിനറുടെ റിപ്പോർട്ട് വ്യക്തമാക്കുന്നു. മാസങ്ങൾക്ക് മുമ്പ് ഡി4വിഡിന്റെ ഉടമസ്ഥതയിലുള്ള ടെസ്ല കാറിന്റെ ഡിക്കിയിൽ നിന്നാണ് പെൺകുട്ടിയുടെ മൃതദേഹാവശിഷ്ടങ്ങൾ കണ്ടെത്തിയത്.
ഡേവിഡ് ആന്റണി ബർക്ക് എന്ന ഡി4വിഡിന്റെ പേരിൽ രജിസ്റ്റർ ചെയ്ത കാറിൽ സിപ്പർ ബാഗുകളിൽ പൊതിഞ്ഞ നിലയിലായിരുന്നു പെൺകുട്ടിയുടെ ശരീരം. മൃതദേഹം വെട്ടിനുറുക്കിയ നിലയിലായിരുന്നുവെന്നും റിപ്പോർട്ടുകൾ സൂചിപ്പിക്കുന്നു. ശരീരത്തിന്റെ വിവിധ ഭാഗങ്ങളിൽ മൂർച്ചയുള്ള ആയുധങ്ങൾ കൊണ്ട് കുത്തേറ്റ മുറിവുകളുണ്ടെങ്കിലും കൃത്യമായി ഏത് ആയുധമാണ് ഉപയോഗിച്ചതെന്ന് റിപ്പോർട്ടിൽ പറയുന്നില്ല. മൃതദേഹം ഏറെ നാൾ പഴക്കമുള്ളതും അഴുകിയ നിലയിലുമായിരുന്നതിനാൽ കൂടുതൽ പരിശോധനകൾക്ക് പരിമിതിയുണ്ടായിരുന്നു.
2024-ലാണ് പെൺകുട്ടിയെ കാണാതാകുന്നത്. പിന്നീട് 2025 ഏപ്രിലിൽ ഹോളിവുഡ് ഹിൽസിൽ ഡി4വിഡ് വാടകയ്ക്കെടുത്ത വീട്ടിൽ വെച്ചാണ് കൊലപാതകം നടന്നതെന്ന് പ്രോസിക്യൂഷൻ ആരോപിക്കുന്നു. ആഴ്ചകളോളം ഉപേക്ഷിക്കപ്പെട്ട നിലയിൽ കിടന്ന കാറിൽ നിന്ന് ദുർഗന്ധം വമിച്ചതിനെത്തുടർന്ന് നടത്തിയ പരിശോധനയിലാണ് ഞെട്ടിക്കുന്ന വിവരം പുറത്തറിയുന്നത്. പ്രായപൂർത്തിയാകാത്ത പെൺകുട്ടിയുമായി ഗായകൻ ലൈംഗിക ബന്ധത്തിൽ ഏർപ്പെട്ടിരുന്നതായും അന്വേഷണ ഉദ്യോഗസ്ഥർ വിശ്വസിക്കുന്നു.
അതേസമയം, തിങ്കളാഴ്ച കോടതിയിൽ ഹാജരാക്കിയ ഡി4വിഡ് കുറ്റം നിഷേധിച്ചു. സെലസ്റ്റിന്റെ മരണത്തിന് തന്റെ കക്ഷി ഉത്തരവാദിയല്ലെന്നാണ് പ്രതിഭാഗം അഭിഭാഷകന്റെ വാദം. 2022-ൽ ‘റൊമാന്റിക് ഹോമിസൈഡ്’ എന്ന ഗാനത്തിലൂടെ ലോകപ്രശസ്തനായ ഈ യുവഗായകൻ ഇത്രയും ക്രൂരമായ കൊലപാതകത്തിൽ പ്രതിയായത് സംഗീത പ്രേമികളെ ഒന്നടങ്കം ഞെട്ടിച്ചിരിക്കുകയാണ്. കൊലപാതകം, ലൈംഗികാതിക്രമം, മൃതദേഹത്തോടുള്ള അനാദരവ് തുടങ്ങിയ കുറ്റങ്ങളാണ് ഗായകനെതിരെ ചുമത്തിയിരിക്കുന്നത്.
Summary: The autopsy report of 14-year-old Celeste Rivas Hernandez, allegedly murdered by indie-pop musician D4vd (David Burke), reveals she died from “multiple penetrating injuries.” Her dismembered remains were found in the trunk of a Tesla registered to the singer. While prosecutors allege a sexual relationship and murder at a rented Hollywood Hills home, D4vd has pleaded not guilty to first-degree murder and other charges. The singer, famous for hits like “Romantic Homicide,” performed at Coachella just last year.
