ലണ്ടൻ: ബ്രിട്ടനിലെ ഒരു ദമ്പതികളുടെ വളർത്തുമൃഗമായ ഹെർബി എന്ന മുയൽ ലോകത്തിലെ ഏറ്റവും പ്രായം കൂടിയ ജീവിച്ചിരിക്കുന്ന മുയലായി ഗിന്നസ് വേൾഡ് റെക്കോർഡ്സിൽ ഇടംപിടിച്ചു (World Oldest Rabbit Herbie). 15 വർഷവും 82 ദിവസവുമാണ് നിലവിൽ ഈ മുയലിന്റെ പ്രായം.
സറേ സ്വദേശികളായ റിച്ചാർഡ്, മെലിസ ഡൺഹാം എന്നിവരുടെ ഉടമസ്ഥതയിലുള്ളതാണ് ‘ലയൺഹെഡ്’ ഇനത്തിൽപ്പെട്ട ഹെർബി. 2025 നവംബർ 10-നാണ് ഹെർബിയുടെ പ്രായം ഗിന്നസ് അധികൃതർ ഔദ്യോഗികമായി സ്ഥിരീകരിച്ചത്. സാധാരണ മുയലുകളുടെ ആയുസ്സിന്റെ ഇരട്ടിയിലധികം പ്രായം ഹെർബി പിന്നിട്ടുകഴിഞ്ഞു. തന്റെ എട്ടാം ആഴ്ചയിലാണ് ഹെർബി ഡൺഹാം കുടുംബത്തിന്റെ ഭാഗമായത്. ഫ്ലോപ്സി എന്ന മുയലിന് കൂട്ടായാണ് ഹെർബിയെ കൊണ്ടുവന്നത്. അവർ പത്ത് വർഷത്തോളം ഒരുമിച്ച് കഴിഞ്ഞു.
പ്രായമായെങ്കിലും വളരെ ഊർജ്ജസ്വലനാണ് ഹെർബി എന്ന് ഉടമ മെലിസ പറയുന്നു. പൂന്തോട്ടത്തിൽ വെയിൽ കായുന്നതും സോഫയിൽ കിടന്ന് മനുഷ്യരോട് ചേർന്ന് ഇരിക്കുന്നതുമാണ് ഹെർബിയുടെ ഇപ്പോഴത്തെ പ്രധാന വിനോദങ്ങൾ. മുയലുകളുടെ ശരാശരി ആയുസ്സ് 5 മുതൽ 8 വർഷം വരെയാണെന്നിരിക്കെ, ഹെർബിയുടെ ഈ ദീർഘായുസ്സ് അത്ഭുതകരമായാണ് മൃഗസ്നേഹികൾ കാണുന്നത്.
Summary: A 15-year-old lionhead rabbit named Herbie has been officially recognized as the world’s oldest living rabbit by Guinness World Records. Owned by Richard and Melissa Dunham of Surrey, UK, Herbie’s age was verified at 15 years and 82 days. Having outlived the typical rabbit life expectancy by double, Herbie enjoys spending time in the garden and cuddling with his owners.
