ന്യൂഡൽഹി: ഹോർമുസ് കടലിടുക്കിൽ ഇന്ത്യൻ എണ്ണക്കപ്പലുകൾക്ക് നേരെ ഇറാന്റെ റെവല്യൂഷണറി ഗാർഡ്സ് വെടിയുതിർത്ത സംഭവത്തിൽ കടുത്ത പ്രതിഷേധവുമായി ഇന്ത്യ. ഇത്തരം പ്രവൃത്തികൾ ആവർത്തിച്ചാൽ ഗുരുതരമായ പ്രത്യാഘാതങ്ങൾ നേരിടേണ്ടി വരുമെന്ന് ഇന്ത്യ ഇറാന് മുന്നറിയിപ്പ് നൽകി (India Warning to Iran). ശനിയാഴ്ച നടന്ന വെടിവെപ്പിൽ ഇന്ത്യൻ കപ്പലുകളായ ‘ജഗ് അർണവ്’, ‘സാൻമാർ ഹെറാൾഡ്’ എന്നിവയിലെ ആളപായം ഒഴിവായെങ്കിലും കപ്പലുകൾക്ക് കേടുപാടുകൾ സംഭവിച്ചിട്ടുണ്ട്.
സൗദിയിൽ നിന്നും ഇറാഖിൽ നിന്നും ഇന്ത്യയിലേക്ക് ക്രൂഡ് ഓയിലുമായി വരികയായിരുന്ന കപ്പലുകൾക്ക് നേരെയാണ് ആക്രമണമുണ്ടായത്. ഒരു കപ്പലിന്റെ കാബിൻ ചില്ല് തകർന്നു. ആക്രമണത്തെ തുടർന്ന് കപ്പലുകൾക്ക് ഹോർമുസ് കടലിടുക്കിൽ നിന്ന് പിന്തിരിയേണ്ടി വന്നു. യുഎസ്-ഇസ്രായേൽ സംഘർഷത്തിന്റെ പശ്ചാത്തലത്തിൽ ഹോർമുസ് വഴി കടന്നുപോകുന്ന കപ്പലുകളിൽ നിന്ന് നികുതി ഈടാക്കാൻ ഐആർജിഎസ് ശ്രമിക്കുന്നുണ്ട്. എന്നാൽ ഇത്തരം നിയമവിരുദ്ധമായ ആവശ്യങ്ങൾക്ക് വഴങ്ങില്ലെന്ന് ഇന്ത്യ വ്യക്തമാക്കി.
ഇറാനിയൻ യുദ്ധക്കപ്പലായ ‘ഐആർഐഎസ് ലാവൻ’ കൊച്ചി തുറമുഖത്ത് ഇന്ത്യയുടെ സഹായത്തോടെ അറ്റകുറ്റപ്പണികൾക്കായി കിടക്കുമ്പോഴാണ് ഇന്ത്യയുടെ തന്നെ കപ്പലുകൾക്ക് നേരെ ഇറാൻ വെടിവെപ്പ് നടത്തിയത്. ഇത് നയതന്ത്രതലത്തിൽ വലിയ അതൃപ്തിക്ക് കാരണമായിട്ടുണ്ട്. വിദേശകാര്യ മന്ത്രാലയം ഇറാനിയൻ പ്രതിനിധിയെ വിളിച്ചുവരുത്തി ശക്തമായ പ്രതിഷേധം രേഖപ്പെടുത്തി. ഹോർമുസ് കടലിടുക്കിലെ സ്വതന്ത്രമായ കപ്പൽ ഗതാഗതത്തെ ഇന്ത്യ പിന്തുണയ്ക്കുന്നുവെന്നും അത് തടസ്സപ്പെടുത്താനുള്ള നീക്കം അനുവദിക്കില്ലെന്നും ഉദ്യോഗസ്ഥർ അറിയിച്ചു.
യുഎസ് ഉപരോധം നിലനിൽക്കുന്നതിനാൽ ഇറാൻ ഹോർമുസ് കടലിടുക്ക് അടച്ചിടാൻ ശ്രമിക്കുന്നത് ആഗോള എണ്ണ വിപണിയെയും ഇന്ത്യയുടെ ഊർജ്ജ സുരക്ഷയെയും പ്രതികൂലമായി ബാധിക്കുമെന്ന ആശങ്ക നിലനിൽക്കുന്നുണ്ട്.
Summary: India has issued a stern warning to Iran following the firing on two Indian oil tankers, Jag Arnav and Sanmar Herald, by the IRGC in the Strait of Hormuz. India stated that any recurrence would lead to serious consequences. While no casualties were reported, the vessels sustained minor damages and were forced to retreat. The incident occurred even as an Iranian warship is docked in Kochi for assistance. India rejected Iran’s reported attempts to levy taxes on passing vessels and summoned the Iranian envoy to register a strong protest against the disruption of free maritime passage.
