റായ്പൂർ: ഛത്തീസ്ഗഢിലെ ശക്തി ജില്ലയിലുള്ള സിങ്താരായിയിലെ വേദാന്ത തെർമൽ പവർ പ്ലാന്റിലുണ്ടായ ബോയിലർ സ്ഫോടനത്തിൽ മരിച്ചവരുടെ എണ്ണം 23 ആയി ഉയർന്നു (Vedanta Boiler Blast Death Toll). ചികിത്സയിലായിരുന്ന രണ്ട് തൊഴിലാളികൾ കൂടി ശനിയാഴ്ച മരണപ്പെട്ടതോടെയാണിത്. ഏപ്രിൽ 14-നാണ് നാടിനെ നടുക്കിയ ദുരന്തം നടന്നത്. റായ്പൂരിലെ കൽദ ആശുപത്രിയിലും റായ്ഗഡ് മെഡിക്കൽ കോളേജിലും ചികിത്സയിലായിരുന്നവരാണ് മരിച്ചത്. നിലവിൽ 12 തൊഴിലാളികൾ കൂടി ഗുരുതര പരിക്കുകളോടെ ചികിത്സയിൽ തുടരുകയാണ്.
ബോയിലർ ഫർണസിനുള്ളിൽ അമിതമായി ഇന്ധനം അടിഞ്ഞുകൂടിയതാണ് അപകടകാരണമെന്ന് ചീഫ് ബോയിലർ ഇൻസ്പെക്ടറുടെ പ്രാഥമിക റിപ്പോർട്ട് വ്യക്തമാക്കുന്നു. ഇതുമൂലം മർദ്ദം പെട്ടെന്ന് വർദ്ധിക്കുകയും പൈപ്പുകൾ തകർന്ന് സ്ഫോടനം സംഭവിക്കുകയുമായിരുന്നു. സംഭവത്തിൽ വേദാന്ത ഡയറക്ടർ അനിൽ അഗർവാൾ, മാനേജർ ദേവേന്ദ്ര പട്ടേൽ എന്നിവരുൾപ്പെടെയുള്ള ഉദ്യോഗസ്ഥർക്കെതിരെ പോലീസ് കേസെടുത്തിട്ടുണ്ട്. സ്ഫോടന സമയത്ത് തീനാളങ്ങൾക്കിടയിൽ അകപ്പെട്ട തൊഴിലാളികൾക്ക് രക്ഷപ്പെടാൻ സമയം ലഭിച്ചില്ലെന്ന് ദൃക്സാക്ഷികൾ പറയുന്നു.
കേന്ദ്ര സംഘം ശനിയാഴ്ച പ്ലാന്റ് സന്ദർശിച്ച് വിശദമായ പരിശോധനകൾ നടത്തും. അപകടത്തിൽ മരിച്ചവരുടെ കുടുംബങ്ങൾക്ക് പ്രധാനമന്ത്രി നരേന്ദ്ര മോദി രണ്ട് ലക്ഷം രൂപയും പരിക്കേറ്റവർക്ക് 50,000 രൂപയും ധനസഹായം പ്രഖ്യാപിച്ചു.
Summary: The death toll from the boiler explosion at the Vedanta thermal power plant in Chhattisgarh’s Singhtarai has risen to 23, with two more workers succumbing to their injuries. The explosion occurred on April 14 due to excessive fuel accumulation and a sudden pressure rise in the boiler. Police have registered a case against Vedanta Director Anil Agarwal and other officials for negligence. Prime Minister Narendra Modi expressed condolences and announced ex-gratia of Rs 2 lakh for the deceased’s kin and Rs 50,000 for the injured.
