ന്യൂഡൽഹി: അസം മുഖ്യമന്ത്രി ഹിമന്ത ബിശ്വ ശർമ്മയുടെ ഭാര്യ റിനികി ഭുയാൻ നൽകിയ പരാതിയിൽ കോൺഗ്രസ് നേതാവ് പവൻ ഖേരയ്ക്കെതിരെ അസം പോലീസ് നടപടി ആരംഭിച്ചു (Assam Police Pawan Khera Delhi). ചൊവ്വാഴ്ച രാവിലെ ഡൽഹിയിലെ ഖേരയുടെ വസതിയിൽ പോലീസ് സംഘം എത്തിയെങ്കിലും അദ്ദേഹം വീട്ടിലുണ്ടായിരുന്നില്ല. ഡൽഹി പോലീസിന്റെ സഹായത്തോടെയായിരുന്നു അസം പോലീസിന്റെ നീക്കം.
കഴിഞ്ഞ ദിവസം നടത്തിയ വാർത്താസമ്മേളനത്തിൽ റിനികി ഭുയാനെതിരെ അതീവ ഗുരുതരമായ ആരോപണങ്ങളാണ് പവൻ ഖേര ഉന്നയിച്ചത്.
യുഎഇ, ഈജിപ്ത്, ആന്റിഗ്വ ആൻഡ് ബാർബുഡ എന്നിവിടങ്ങളിൽ നിന്നുള്ള മൂന്ന് വ്യത്യസ്ത പാസ്പോർട്ടുകൾ റിനികിക്ക് ഉണ്ടെന്ന് ഖേര ആരോപിച്ചു. ദുബായിൽ സ്വത്തുക്കളുണ്ടെന്നും അമേരിക്കയിലെ വ്യോമിംഗിൽ റിനികിക്ക് കമ്പനിയുണ്ടെന്നും അദ്ദേഹം പറഞ്ഞു.
തിരഞ്ഞെടുപ്പ് സത്യവാങ്മൂലത്തിൽ മുഖ്യമന്ത്രി ഈ വിവരങ്ങൾ ബോധപൂർവ്വം മറച്ചുവെച്ചുവെന്നും ഖേര ആരോപിച്ചു.
ആരോപണങ്ങൾ രാഷ്ട്രീയ പ്രേരിതമാണെന്ന് തള്ളിയ മുഖ്യമന്ത്രി ഹിമന്ത ബിശ്വ ശർമ്മ, പവൻ ഖേരയ്ക്കെതിരെ രൂക്ഷമായ ഭാഷയിലാണ് പ്രതികരിച്ചത്. ഖേരയെ ‘പവൻ പേഡ’ ആക്കുമെന്ന് പരിഹസിച്ച അദ്ദേഹം ശക്തമായ നിയമനടപടികൾ ഉണ്ടാകുമെന്ന് മുന്നറിയിപ്പ് നൽകി. ഇതിന് പിന്നാലെയാണ് റിനികി ഭുയാൻ പോലീസിൽ പരാതി നൽകിയത്.
നിലവിൽ താൻ ഹൈദരാബാദിലാണെന്നും ആരോപണങ്ങളിൽ നിന്ന് ഒളിച്ചോടില്ലെന്നും പവൻ ഖേര പ്രതികരിച്ചു. ഇന്ന് തന്നെ അസമിലേക്ക് മടങ്ങുമെന്നും അദ്ദേഹം വ്യക്തമാക്കിയിട്ടുണ്ട്.
ഏപ്രിൽ 9-ന് നടക്കാനിരിക്കുന്ന നിയമസഭാ തിരഞ്ഞെടുപ്പിന്റെ പ്രചാരണം അവസാന ഘട്ടത്തിൽ എത്തിനിൽക്കെയാണ് ഈ നാടകീയ നീക്കങ്ങൾ. ബിജെപി 100-ലധികം സീറ്റുകൾ നേടി അധികാരം നിലനിർത്തുമെന്ന് മുഖ്യമന്ത്രി ആത്മവിശ്വാസം പ്രകടിപ്പിക്കുമ്പോൾ, ഭരണകുടുംബത്തിനെതിരെയുള്ള അഴിമതി ആരോപണങ്ങൾ ആയുധമാക്കുകയാണ് കോൺഗ്രസ്.
Story Summary:
Assam Police arrived at the Delhi residence of Congress leader Pawan Khera following a complaint filed by Riniki Bhuyan, wife of Assam CM Himanta Biswa Sarma. Khera had recently alleged that Riniki holds three different passports and owns undisclosed assets abroad, which the CM allegedly concealed in his election affidavit. While Khera was not home during the police visit, he stated from Hyderabad that he would return to Assam to face the legal actions. This political drama unfolds just two days before the Assam Assembly elections on April 9.
