സേലം: തമിഴ്നാട്ടിലെ സേലത്ത് മകനെ കൊലപ്പെടുത്തി അടയ്ക്ക തോട്ടത്തിൽ കുഴിച്ചുമൂടിയ സംഭവത്തിൽ അമ്മ പിടിയിൽ (Salem Crime News 2026). വാഴപ്പാടി ബേലൂരിനടുത്തുള്ള കരടിപ്പട്ടി സ്വദേശിയും നിർമ്മാണ തൊഴിലാളിയുമായ മണികണ്ഠൻ (32) ആണ് കൊല്ലപ്പെട്ടത്. സംഭവത്തിൽ ഇയാളുടെ അമ്മ ജ്യോതിയെ പോലീസ് അറസ്റ്റ് ചെയ്തു.
കഴിഞ്ഞ മാർച്ച് എട്ട് മുതൽ മണികണ്ഠനെ കാണാനില്ലായിരുന്നു. മണികണ്ഠനുമായി പിരിഞ്ഞു താമസിക്കുകയായിരുന്ന ഭാര്യ വിനോദിനിക്ക് ഭർത്താവിനെ കാണാതായതിൽ സംശയം തോന്നിയതിനെത്തുടർന്ന് ഏപ്രിൽ ഒന്നിന് വാഴപ്പാടി പോലീസ് സ്റ്റേഷനിൽ പരാതി നൽകി. പോലീസിന്റെ വിശദമായ ചോദ്യം ചെയ്യലിലാണ് കൊലപാതക വിവരം പുറത്തുവന്നത്.
മദ്യപാനത്തിന് അടിമയായിരുന്ന മണികണ്ഠൻ വീട്ടുകാരുമായി നിരന്തരം വഴക്കിടാറുണ്ടായിരുന്നു. പത്ത് വർഷം മുൻപായിരുന്നു മണികണ്ഠന്റെയും വിനോദിനിയുടെയും വിവാഹം. നിരന്തരമായ പിണക്കങ്ങളെത്തുടർന്ന് വിനോദിനി സ്വന്തം വീട്ടിലേക്ക് മാറി താമസിക്കുകയായിരുന്നു.
വീട്ടിലുണ്ടായ തർക്കത്തിനിടെ അമ്മ ജ്യോതി മകനെ കല്ലുകൊണ്ട് തലയ്ക്കടിച്ചു കൊലപ്പെടുത്തുകയായിരുന്നു. തുടർന്ന് ബന്ധുക്കളുടെ സഹായത്തോടെ മൃതദേഹം അടുത്തുള്ള അടയ്ക്ക തോട്ടത്തിൽ കുഴിച്ചുമൂടി.
പ്രതി നൽകിയ വിവരത്തിന്റെ അടിസ്ഥാനത്തിൽ തോട്ടത്തിൽ നിന്ന് മൃതദേഹം കണ്ടെടുത്തു. ഉദ്യോഗസ്ഥരുടെ സാന്നിധ്യത്തിൽ സംഭവസ്ഥലത്ത് വെച്ച് തന്നെ പോസ്റ്റ്മോർട്ടം നടപടികൾ പൂർത്തിയാക്കി. കൊലപാതകത്തിന് ശേഷവും മൃതദേഹം മറവ് ചെയ്യാനും ജ്യോതിയെ സഹായിച്ച ബന്ധുക്കൾക്കായി പോലീസ് തിരച്ചിൽ ഊർജ്ജിതമാക്കിയിട്ടുണ്ട്.
Story Summary:
A woman named Jyothi has been arrested in Salem, Tamil Nadu, for allegedly killing her son, Manikandan, and burying his body in an areca nut grove. Manikandan, a construction worker and alcoholic, had been missing since March 8. After his estranged wife filed a police complaint, the murder came to light. Jyothi confessed to hitting him with a stone during a family dispute. Police exhumed the body and are searching for relatives who assisted in hiding the crime.
