കൊച്ചി: ‘ന്നാ താൻ കേസ് കൊട്’ എന്ന സൂപ്പർ ഹിറ്റ് ചിത്രത്തിന് ശേഷം കുഞ്ചാക്കോ ബോബനും സംവിധായകൻ രതീഷ് പൊതുവാളും വീണ്ടും ഒന്നിക്കുന്ന ‘ഒരു ദുരൂഹ സാഹചര്യത്തിൽ’ എന്ന സിനിമയുടെ ട്രെയിലർ പുറത്തിറങ്ങി (Oru Durooha Saahacharyathil Trailer). സസ്പെൻസും കൗതുകവും നിറഞ്ഞ ട്രെയിലർ പുറത്തുവന്നതോടെ ആരാധകർ വലിയ ആവേശത്തിലാണ്. ചിത്രം വിഷു ദിനമായ ഏപ്രിൽ 15-ന് തിയേറ്ററുകളിലെത്തും.
മലയാള സിനിമയിലെ രണ്ട് തലമുറകളിലെ പ്രമുഖ നിർമ്മാണ കമ്പനികളായ ഉദയ പിക്ചേഴ്സും മാജിക് ഫ്രെയിംസും ആദ്യമായി കൈകോർക്കുന്നു എന്ന പ്രത്യേകതയും ഈ ചിത്രത്തിനുണ്ട്. ഉദയ പിക്ചേഴ്സിന്റെ ബാനറിൽ കുഞ്ചാക്കോ ബോബനും ഈ ചിത്രത്തിന്റെ നിർമ്മാണത്തിൽ പങ്കാളിയാണ്. ലിസ്റ്റിൻ സ്റ്റീഫന്റെ മാജിക് ഫ്രെയിംസാണ് ചിത്രം വിതരണത്തിനെത്തിക്കുന്നത്. വയനാട്, തിരുനെല്ലി എന്നിവിടങ്ങളിലായി ചിത്രീകരണം പൂർത്തിയാക്കിയ സിനിമയിൽ കുഞ്ചാക്കോ ബോബനൊപ്പം വലിയൊരു താരനിര തന്നെയുണ്ട്.
ദിലീഷ് പോത്തൻ, സജിൻ ഗോപു, ചിദംബരം, സുധീഷ്, ജാഫർ ഇടുക്കി, രാജേഷ് മാധവ്, ഷാഹി കബീർ, കുഞ്ഞികൃഷ്ണൻ മാഷ്, ശരണ്യ രാമചന്ദ്രൻ, പൂജ മോഹൻരാജ് തുടങ്ങിയവർ പ്രധാന വേഷങ്ങളിൽ എത്തുന്നു. അർജുൻ സേതു (ഛായാഗ്രഹണം), മനോജ് കണ്ണോത്ത് (എഡിറ്റിംഗ്), ഡോൺ വിൻസന്റ് (സംഗീതം), ഇന്ദുലാൽ കാവീട് (കലാസംവിധാനം).
നേരത്തെ പുറത്തിറങ്ങിയ ചിത്രത്തിലെ ഗാനങ്ങളും പോസ്റ്ററുകളും സോഷ്യൽ മീഡിയയിൽ ഏറെ ചർച്ചയായിരുന്നു. വ്യത്യസ്തമായ പ്രമേയങ്ങൾ കൈകാര്യം ചെയ്യുന്ന രതീഷ് പൊതുവാൾ ഇത്തവണയും പ്രേക്ഷകർക്കായി കരുതിവെച്ചിരിക്കുന്നത് ഒരു ദൃശ്യവിരുന്നാണെന്നാണ് ട്രെയിലർ നൽകുന്ന സൂചന.
Story Summary:
The trailer for ‘Oru Durooha Saahacharyathil Trailer’, the much-anticipated collaboration between Kunchacko Boban and director Ratheesh Balakrishnan Poduval after ‘Nna Thaan Case Kodu’, has been released. Produced by Udaya Pictures and Magic Frames, the film features a stellar cast including Dileesh Pothan and Sajin Gopu. Shot in Wayanad and Thirunelli, the suspense-filled movie is set to hit theaters on Vishu, April 15, 2026.
