പ്യോങ്യാങ്: പാശ്ചാത്യ രാജ്യങ്ങളുടെ ഉപരോധങ്ങളെയും സമ്മർദ്ദങ്ങളെയും സംയുക്തമായി പ്രതിരോധിക്കാൻ ധാരണയിലെത്തി ബെലാറസും ഉത്തരകൊറിയയും. പ്യോങ്യാങ്ങിൽ നടന്ന ഉച്ചകോടിക്കിടെ ബെലാറസ് പ്രസിഡന്റ് അലക്സാണ്ടർ ലുകാഷെങ്കോയും ഉത്തരകൊറിയൻ നേതാവ് കിം ജോങ് ഉന്നും പുതിയ സൗഹൃദ ഉടമ്പടിയിൽ ഒപ്പുവെച്ചു.(Belarus leader gifts rifle to Kim Jong Un as they sign friendship treaty)
കൂടിക്കാഴ്ചയ്ക്കിടെ കിം ജോങ് ഉന്നിന് ഒരു ഓട്ടോമാറ്റിക് റൈഫിൾ ലുകാഷെങ്കോ സമ്മാനമായി നൽകി. “ശത്രുക്കൾ പ്രത്യക്ഷപ്പെട്ടാൽ ഉപയോഗിക്കാൻ” വേണ്ടിയാണ് ഈ സമ്മാനമെന്ന് അദ്ദേഹം തമാശയായി പറഞ്ഞതായി ബെലാറസ് ഔദ്യോഗിക മാധ്യമങ്ങൾ റിപ്പോർട്ട് ചെയ്തു. മറുപടിയായി ഒരു വാളും ലുകാഷെങ്കോയുടെ ചിത്രം പതിപ്പിച്ച പൂപാത്രവുമാണ് കിം സമ്മാനിച്ചത്.
ഇരുരാജ്യങ്ങളും തമ്മിലുള്ള ബന്ധത്തിന്റെ സുസ്ഥിരമായ വികാസത്തിന് ഈ ഉടമ്പടി ഉറപ്പുനൽകുന്നുവെന്ന് കിം ജോങ് ഉൻ വ്യക്തമാക്കി. അന്താരാഷ്ട്ര നിയമങ്ങൾ ലംഘിക്കപ്പെടുന്ന കാലഘട്ടത്തിൽ പരമാധികാരം സംരക്ഷിക്കാൻ സഹകരണം അത്യാവശ്യമാണെന്ന് ലുകാഷെങ്കോ കൂട്ടിച്ചേർത്തു. കൃഷി, വിവരസാങ്കേതിക വിദ്യ, പൊതുജനാരോഗ്യം തുടങ്ങിയ മേഖലകളിൽ ഇരുരാജ്യങ്ങളും സംയുക്തമായി പ്രവർത്തിക്കാൻ ധാരണയായി. ഈ പുതിയ സഖ്യം പാശ്ചാത്യ രാജ്യങ്ങൾക്കിടയിൽ ആശങ്കയുണ്ടാക്കുന്നുണ്ട്. അച്ചടക്കമുള്ള ജനതയുള്ള ഉത്തരകൊറിയക്ക് വലിയൊരു ഭാവി കാത്തിരിക്കുന്നുണ്ടെന്ന് ലുകാഷെങ്കോ അഭിപ്രായപ്പെട്ടു. ഉച്ചകോടിക്ക് ശേഷം ബെലാറസ് പ്രതിനിധി സംഘം പ്യോങ്യാങ്ങിലെ വിവിധ വികസന പദ്ധതികൾ സന്ദർശിച്ചു.
