കൊച്ചി: 1950-60 കാലഘട്ടത്തിലെ കഥ പറയുന്ന ‘പള്ളിച്ചട്ടമ്പി’യുടെ ആവേശകരമായ ടീസർ അണിയറപ്രവർത്തകർ പുറത്തുവിട്ടു (Pallichattambi Movie Teaser). ‘ജനഗണമന’യ്ക്ക് ശേഷം ഡിജോ ജോസ് ആന്റണി സംവിധാനം ചെയ്യുന്ന ഈ ചിത്രത്തിൽ ടൊവിനോ തോമസ് അതിശക്തമായ കഥാപാത്രമായാണ് എത്തുന്നത്. കയാദു ലോഹറാണ് ചിത്രത്തിലെ നായിക.
അഞ്ചു ഭാഷകളിൽ പുറത്തിറങ്ങുന്ന ഈ ചിത്രം 1950-60 കാലഘട്ടത്തിലെ പശ്ചാത്തലത്തിലാണ് ഒരുക്കിയിരിക്കുന്നത്. ടീസറിലെ ദൃശ്യമികവും പീരിയഡ് സെറ്റിംഗും പ്രേക്ഷകർക്കിടയിൽ വലിയ പ്രതീക്ഷയാണ് നൽകുന്നത്. ജേക്ക്സ് ബിജോയ് ഒരുക്കിയ ‘കാട്ടുചെമ്പകം’ എന്ന ഗാനം ഇതിനോടകം തന്നെ സോഷ്യൽ മീഡിയയിൽ തരംഗമാണ്. ബോളിവുഡ് ഗായകൻ വിശാൽ മിശ്ര മലയാളത്തിൽ ആദ്യമായി പാടിയ ഗാനം കൂടിയാണിത്. ‘ക്വീൻ’, ‘ജനഗണമന’, ‘മലയാളി ഫ്രം ഇന്ത്യ’ എന്നീ ഹിറ്റുകൾക്ക് ശേഷം ഡിജോയും ജേക്ക്സും ഒന്നിക്കുന്ന നാലാമത്തെ ചിത്രമാണിത്.
വിജയരാഘവൻ, സുധീർ കരമന, ബാബുരാജ്, വിനോദ് കെടാമംഗലം, പ്രശാന്ത് അലക്സ് തുടങ്ങിയ വലിയ താരനിര തന്നെ ചിത്രത്തിൽ അണിനിരക്കുന്നുണ്ട്. ഹിറ്റ് തിരക്കഥാകൃത്ത് എസ്. സുരേഷ് ബാബുവാണ് രചന നിർവ്വഹിച്ചിരിക്കുന്നത്. ടിജോ ടോമിയാണ് ഛായാഗ്രഹണം. വേൾഡ് വൈഡ് ഫിലിംസും സി ക്യൂബ് ബ്രോസ് എന്റർടൈൻമെന്റും ചേർന്നാണ് ചിത്രം നിർമ്മിക്കുന്നത്.
ഏപ്രിൽ 10-ന് ലോകമെമ്പാടുമുള്ള തീയേറ്ററുകളിൽ ചിത്രം റിലീസ് ചെയ്യും. വിഷു വിപണിയിൽ ടൊവിനോയുടെ ഈ പീരിയഡ് ആക്ഷൻ ത്രില്ലർ വലിയ ചലനം സൃഷ്ടിക്കുമെന്നാണ് കരുതപ്പെടുന്നത്.
Movie Summary:
The official teaser of ‘Pallichattambi’, starring Tovino Thomas and directed by Dijo Jose Antony, has been released. This period drama thriller set in the 1950s-60s is scheduled for a worldwide release in five languages on April 10, 2026. Featuring music by Jakes Bejoy and a script by S. Suresh Babu, the film has already gained massive attention through its viral song ‘Kattuchembagam’ sung by Vishal Mishra. The movie is produced under the banners of World Wide Films and C Cube Bros Entertainment.
