സോൾ: ദക്ഷിണ കൊറിയയിലെ ഡെജിയോൺ നഗരത്തിലുള്ള വാഹന പാർട്സ് നിർമ്മാണ ശാലയിലുണ്ടായ ശക്തമായ സ്ഫോടനത്തിലും തീപിടുത്തത്തിലും 14 പേർ കൊല്ലപ്പെട്ടു. വെള്ളിയാഴ്ച ഉച്ചയ്ക്ക് 1.18-ഓടെ ‘അഞ്ജുൻ ഇൻഡസ്ട്രിയൽ’ എന്ന സ്ഥാപനത്തിലാണ് അപകടമുണ്ടായത് (South Korea Factory Fire). ശനിയാഴ്ച നടത്തിയ തിരച്ചിലിലാണ് തകർന്ന കെട്ടിടത്തിനുള്ളിൽ നിന്ന് മൃതദേഹങ്ങൾ കണ്ടെടുത്തത്. അപകടത്തിൽ 59 പേർക്ക് പരിക്കേൽക്കുകയും ചെയ്തിട്ടുണ്ട്.
മരിച്ചവരിൽ ഒൻപത് പേരുടെ മൃതദേഹങ്ങൾ കെട്ടിടത്തിന്റെ മൂന്നാം നിലയിലെ ജിമ്മിൽ നിന്നുമാണ് കണ്ടെത്തിയത്. മൂന്ന് പേരെ രണ്ടാം നിലയിലെ വാട്ടർ ടാങ്കിന് സമീപവും കണ്ടെത്തി. കാണാതായവർക്കായി നടത്തിയ തിരച്ചിലിൽ റോബോട്ടുകളെയും ഡ്രോണുകളെയും ഉപയോഗിച്ചിരുന്നു. പരിക്കേറ്റവരിൽ 25 പേരുടെ നില ഗുരുതരമാണെന്നാണ് വിവരം. തീപിടുത്തത്തെത്തുടർന്ന് കെട്ടിടത്തിൽ നിന്ന് താഴേക്ക് ചാടിയവർക്കും പുക ശ്വസിച്ചവർക്കുമാണ് പരിക്കേറ്റത്.
അപകടത്തെത്തുടർന്ന് അഞ്ഞൂറിലധികം അഗ്നിശമനസേനാ അംഗങ്ങളും നൂറിലധികം വാഹനങ്ങളും സ്ഥലത്തെത്തിയാണ് തീ നിയന്ത്രണവിധേയമാക്കിയത്. രക്ഷാപ്രവർത്തനത്തിനിടെ ഫാക്ടറിക്കുള്ളിൽ നിന്ന് 100 കിലോയിലധികം സ്ഫോടനസാധ്യതയുള്ള രാസവസ്തുക്കൾ സുരക്ഷിതമായി നീക്കം ചെയ്തു. കെട്ടിടം ഏത് നിമിഷവും തകരാൻ സാധ്യതയുള്ളതിനാൽ അതീവ ജാഗ്രതയോടെയാണ് തിരച്ചിൽ നടത്തിയത്.
ദക്ഷിണ കൊറിയൻ പ്രസിഡന്റ് ലീ ജെ മ്യുങ് ശനിയാഴ്ച അപകടസ്ഥലം സന്ദർശിക്കുകയും മരിച്ചവരുടെ ബന്ധുക്കളെ കണ്ട് ആശ്വസിപ്പിക്കുകയും ചെയ്തു. സ്ഫോടനത്തിന്റെ യഥാർത്ഥ കാരണം കണ്ടെത്താൻ വിദഗ്ദ്ധ സമിതി അന്വേഷണം ആരംഭിച്ചിട്ടുണ്ട്. പരിക്കേറ്റ 28 പേർ നിലവിൽ വിവിധ ആശുപത്രികളിൽ ചികിത്സയിലാണ്.
Summary: A massive explosion and fire at an auto parts factory in Daejeon, South Korea, killed 14 people and injured 59 others. Rescue workers recovered the remains on Saturday after using specialized robots to access the unstable structure. President Lee Jae Myung visited the site, and an investigation into the cause of the blast is underway.
