പെരുമ്പാവൂർ: വോട്ടർപട്ടികയിലെ അപാകതയെത്തുടർന്ന് നടി ലക്ഷ്മി പ്രിയയെ മാറ്റി പെരുമ്പാവൂരിൽ പുതിയ സ്ഥാനാർത്ഥിയെ പ്രഖ്യാപിച്ച് എൻ.ഡി.എ. മുമ്പ് കോൺഗ്രസ് സഹയാത്രികനും നിലവിൽ ട്വന്റി 20 പ്രവർത്തകനുമായ ജിബി പാത്തിക്കൽ (Jibi Pathickal) ആണ് പെരുമ്പാവൂരിലെ പുതിയ എൻ.ഡി.എ സ്ഥാനാർത്ഥി.
യാക്കോബായ സഭ മാനേജിങ് കമ്മിറ്റി അംഗവും യൂത്ത് അസോസിയേഷൻ പെരുമ്പാവൂർ മേഖല ഭാരവാഹിയുമാണ് ജിബി പാത്തിക്കൽ. ട്വന്റി 20 രൂപീകരണ സമയം മുതൽ സജീവ അംഗമായിരുന്ന അദ്ദേഹം പ്രാദേശിക തലത്തിൽ ശക്തമായ സ്വാധീനമുള്ള നേതാവാണ്.
പെരുമ്പാവൂരിൽ എൻ.ഡി.എ തിരഞ്ഞെടുപ്പ് കമ്മിറ്റി ഓഫീസും റോഡ് ഷോയും ഉദ്ഘാടനം ചെയ്യാൻ കേന്ദ്രമന്ത്രി ഭൂപതിരാജു ശ്രീനിവാസ വർമ്മ എത്തിയപ്പോഴാണ് ലക്ഷ്മി പ്രിയയുടെ പേര് വോട്ടർപട്ടികയിലില്ലെന്ന വിവരം പുറത്തുവരുന്നത്. ഇതോടെ നിശ്ചയിച്ചിരുന്ന റോഡ് ഷോ റദ്ദാക്കി.
ട്വന്റി 20 കൺവീനർ സാബു ജേക്കബ് പ്രഖ്യാപിച്ച സ്ഥാനാർത്ഥികളിൽ ഏറ്റുമാനൂരിലെ വീണാ നായർക്കും വോട്ടർപട്ടികയിൽ പേരുണ്ടായിരുന്നില്ല. വീണയ്ക്ക് പകരക്കാരനെ ഉടൻ പ്രഖ്യാപിക്കും.തൃപ്പൂണിത്തുറയും തൃക്കാക്കരയും: തൃപ്പൂണിത്തുറയിൽ അഞ്ജലി നായരും തൃക്കാക്കരയിൽ അഖിൽ മാരാരും തന്നെ മത്സരരംഗത്തുണ്ടാകും.
പെരുമ്പാവൂരിൽ എൽദോസ് കുന്നപ്പിള്ളിയെച്ചൊല്ലി കോൺഗ്രസിനുള്ളിൽ തർക്കം നിലനിൽക്കുന്ന സാഹചര്യത്തിൽ, സഭാ ബന്ധങ്ങളുള്ള ജിബി പാത്തിക്കലിന്റെ വരവ് മണ്ഡലത്തിലെ മത്സരചിത്രം മാറ്റിവരയ്ക്കുമെന്നാണ് രാഷ്ട്രീയ നിരീക്ഷകർ കരുതുന്നത്.
Story Summary:
Following a major technical glitch where actress Lakshmi Priya’s name was found missing from the voters’ list, the NDA has named Jibi Pathickal as the new candidate for Perumbavoor. Jibi, a former Congress supporter and current Twenty20 member, holds significant influence within the Jacobite Syrian Church. The announcement came after a dramatic turn of events during a scheduled roadshow attended by Union Minister Bhupathiraju Srinivasa Varma.
