ജക്കാർത്ത: ഇന്തോനേഷ്യയിലെ വെസ്റ്റ് ജാവ പ്രവിശ്യയിലുള്ള വെസ്റ്റ് ബന്ദുംഗ് മേഖലയിലുണ്ടായ കനത്ത ഉരുൾപൊട്ടലിൽ ഏഴ് പേർ കൊല്ലപ്പെട്ടു (Indonesia Landslide). ദുരന്തത്തിൽ 82 പേരെ കാണാതായതായി ഇന്തോനേഷ്യൻ ഡിസാസ്റ്റർ മിറ്റിഗേഷൻ ഏജൻസി ശനിയാഴ്ച അറിയിച്ചു. കനത്ത മഴയെത്തുടർന്നാണ് പ്രദേശത്ത് മണ്ണിടിച്ചിലും ഉരുൾപൊട്ടലുമുണ്ടായതെന്നാണ് പ്രാഥമിക റിപ്പോർട്ടുകൾ സൂചിപ്പിക്കുന്നത്.
ഏജൻസി വക്താവ് അബ്ദുൾ മുഹാരിയാണ് മരണസംഖ്യയും കാണാതായവരുടെ വിവരങ്ങളും മാധ്യമങ്ങളോട് പങ്കുവെച്ചത്. കാണാതായവർക്കായി പ്രദേശത്ത് വിപുലമായ തിരച്ചിൽ ആരംഭിച്ചിട്ടുണ്ട്. എന്നാൽ മോശം കാലാവസ്ഥയും മണ്ണും ചെളിയും നിറഞ്ഞ ഭൂപ്രകൃതിയും രക്ഷാപ്രവർത്തനത്തിന് വലിയ വെല്ലുവിളി ഉയർത്തുന്നുണ്ട്. കൂടുതൽ ആളുകൾ മണ്ണിനടിയിൽ കുടുങ്ങിക്കിടക്കാൻ സാധ്യതയുള്ളതിനാൽ മരണസംഖ്യ ഇനിയും ഉയർന്നേക്കാമെന്ന് ആശങ്കയുണ്ട്.
ഉരുൾപൊട്ടലിനെത്തുടർന്ന് നിരവധി വീടുകളും റോഡുകളും തകർന്നു. ദുരിതബാധിത പ്രദേശങ്ങളിൽ നിന്ന് ആളുകളെ സുരക്ഷിത സ്ഥാനങ്ങളിലേക്ക് മാറ്റുന്നതിനുള്ള നടപടികൾ പുരോഗമിക്കുകയാണ്. മേഖലയിൽ മഴ തുടരുന്ന സാഹചര്യത്തിൽ കൂടുതൽ ഉരുൾപൊട്ടലുകൾക്ക് സാധ്യതയുണ്ടെന്നും ജനങ്ങൾ ജാഗ്രത പാലിക്കണമെന്നും അധികൃതർ നിർദ്ദേശിച്ചു. സൈന്യവും പോലീസും സന്നദ്ധപ്രവർത്തകരും സംയുക്തമായാണ് രക്ഷാദൗത്യത്തിൽ ഏർപ്പെട്ടിരിക്കുന്നത്.
A devastating landslide in the West Bandung region of Indonesia’s West Java province has left seven people dead and 82 others missing. According to Indonesia’s disaster mitigation agency spokesperson Abdul Muhari, the incident occurred following heavy rainfall in the area. Rescue operations are currently underway to locate the missing persons, although difficult terrain and ongoing weather conditions are hampering efforts. Local authorities have warned of further risks as the region continues to experience unstable weather.
