അബൂദബി: മേഖലയിലെ അസാധാരണ സാഹചര്യങ്ങളെത്തുടർന്ന് തടസ്സപ്പെട്ട വിമാന സർവീസുകൾ യുഎഇയിൽ സാധാരണ നിലയിലേക്ക് മടങ്ങുന്നു (UAE flight status). സുരക്ഷാ മുൻകരുതലുകൾ പാലിച്ച് വിമാന ഗതാഗതം ഘട്ടംഘട്ടമായി പുനഃസ്ഥാപിച്ചു വരികയാണെന്ന് ജനറൽ സിവിൽ ഏവിയേഷൻ അതോറിറ്റി (GCAA) അറിയിച്ചു. യാത്രാ സുരക്ഷ ഉറപ്പാക്കുന്നതിനായി പ്രത്യേക പ്രവർത്തന പദ്ധതികളും നിയന്ത്രണങ്ങളും നിലവിൽ നടപ്പിലാക്കുന്നുണ്ട്.
യുഎഇ നേതൃത്വത്തിന്റെ നിർദ്ദേശപ്രകാരം ജനങ്ങളുടെ സുരക്ഷയ്ക്കാണ് പ്രഥമ പരിഗണന നൽകുന്നതെന്ന് സാമ്പത്തിക, ടൂറിസം മന്ത്രിയും ജിസിഎഎ ചെയർമാനുമായ അബ്ദുല്ല ബിൻ തൂഖ് അൽ മർറി പറഞ്ഞു. നിലവിലെ സാഹചര്യം കണക്കിലെടുത്ത് സുരക്ഷിതമായ അടിയന്തര റൂട്ടുകൾ വഴിയാണ് ഇപ്പോൾ വിമാനങ്ങൾ സർവീസ് നടത്തുന്നത്.
മാർച്ച് 1 മുതൽ 12 വരെയുള്ള കാലയളവിൽ 14 ലക്ഷം പേർ യുഎഇ വിമാനത്താവളങ്ങൾ വഴി യാത്ര ചെയ്തു. ഈ കാലയളവിൽ ആകെ 7,839 വിമാന ഗതാഗതങ്ങൾ രേഖപ്പെടുത്തി. ദേശീയ എയർലൈനുകൾ സർവീസുകൾ സജീവമാക്കിയിട്ടുണ്ട്. നിലവിൽ മുൻകാല പ്രവർത്തനങ്ങളുടെ 44.6 ശതമാനം ശേഷിയിൽ സർവീസുകൾ എത്തിക്കഴിഞ്ഞു.
പ്രതിസന്ധികളിലും വ്യോമയാന മേഖലയെ കാര്യക്ഷമമായി നിയന്ത്രിക്കാൻ യുഎഇക്ക് സാധിക്കുന്നുണ്ടെന്ന് ജിസിഎഎ ഡയറക്ടർ ജനറൽ സൈഫ് മുഹമ്മദ് അൽ സുവൈദി വ്യക്തമാക്കി. യാത്രക്കാർ വിമാനത്താവളത്തിലേക്ക് പുറപ്പെടുന്നതിന് മുൻപായി അതത് എയർലൈനുകളുടെ പുതിയ അറിയിപ്പുകൾ പരിശോധിച്ച് സമയം ഉറപ്പുവരുത്തണമെന്നും അധികൃതർ നിർദ്ദേശിച്ചു.
Story Summary
The UAE General Civil Aviation Authority (GCAA) announced that flight operations in the country are returning to normalcy following regional tensions. Between March 1 and 12, approximately 1.4 million passengers traveled through UAE airports across 7,839 flights. Minister Abdulla bin Touq Al Marri emphasized that safety remains the priority, with airlines currently operating through approved emergency routes, reaching 44.6% of their previous operational capacity.
