വയനാട്: വയനാട് വെള്ളമുണ്ടയിൽ ബീഫ് ഫ്രൈ കേടായെന്ന് ആരോപിച്ച് ഹോട്ടലിൽ യുവാവിന്റെ പരാക്രമം (Wayanad Hotel Attack Beef Fry Dispute). വെള്ളമുണ്ടയിലെ ‘ബുക്ക് ഇൻ’ ഹോട്ടലിലാണ് സംഭവം നടന്നത്. ഹോട്ടലിൽ നിന്ന് പാഴ്സലായി വാങ്ങിക്കൊണ്ടുപോയ ബീഫ് ഫ്രൈയ്ക്ക് മോശം മണമാണെന്ന് പറഞ്ഞായിരുന്നു യുവാവ് അക്രമം അഴിച്ചുവിട്ടത്.
രണ്ട് ദിവസം മുൻപാണ് സംഭവം നടന്നതെങ്കിലും ഇതിന്റെ ദൃശ്യങ്ങൾ ഇപ്പോഴാണ് പുറത്തുവന്നത്. ഹോട്ടലിലെത്തിയ യുവാവ് ജീവനക്കാരെ അസഭ്യം പറയുകയും കൈയ്യേറ്റം ചെയ്യുകയും ചെയ്തു. തുടർന്ന് ഹോട്ടലിലെ മേശകളും കസേരകളും എറിഞ്ഞു തകർക്കുകയും വലിയ തോതിൽ നാശനഷ്ടങ്ങൾ വരുത്തുകയും ചെയ്തു. അക്രമം നടത്തുമ്പോൾ ഇയാൾ മദ്യപിച്ചിരുന്നതായി ഹോട്ടൽ ജീവനക്കാർ പോലീസിനോട് പറഞ്ഞു.
സംഭവത്തിൽ വെള്ളമുണ്ട പോലീസ് കേസെടുത്ത് അന്വേഷണം ആരംഭിച്ചു. ഹോട്ടലിലെ സിസിടിവി ദൃശ്യങ്ങൾ പോലീസ് ശേഖരിച്ചിട്ടുണ്ട്. ഇതിന്റെ അടിസ്ഥാനത്തിൽ പ്രതിയെക്കുറിച്ച് പോലീസിന് കൃത്യമായ സൂചന ലഭിച്ചതായാണ് വിവരം. ഭക്ഷണത്തിന്റെ ഗുണനിലവാരത്തെക്കുറിച്ച് പരാതിയുണ്ടെങ്കിൽ അധികൃതരെ അറിയിക്കുന്നതിന് പകരം നിയമം കൈയ്യിലെടുക്കുന്ന ഇത്തരം പ്രവണതകൾക്കെതിരെ ശക്തമായ നടപടി സ്വീകരിക്കുമെന്ന് പോലീസ് വ്യക്തമാക്കി.
