വർക്കല: എസ്എൻഡിപി യോഗം ജനറൽ സെക്രട്ടറി വെള്ളാപ്പള്ളി നടേശനെയും ഭരണസമിതിയെയും അയോഗ്യരാക്കിയ ഹൈക്കോടതി വിധി ശ്രീനാരായണ ഭക്തർക്ക് ആശ്വാസകരമാണെന്ന് ശിവഗിരി മഠാധിപതി സ്വാമി സച്ചിദാനന്ദ (High Court Verdict Against Vellappally Natesan). ശ്രീനാരായണ ഗുരുവിന്റെ ദർശനങ്ങൾ നടപ്പിലാക്കുന്നതിൽ യോഗം പരാജയപ്പെട്ടുവെന്നും എസ്എൻഡിപി നിലവിൽ ഒരു ആൾക്കൂട്ടം മാത്രമായി മാറിയെന്നും അദ്ദേഹം വിമർശിച്ചു.
“ജാതി ചോദിക്കരുത്, പറയരുത്” എന്ന ഗുരുദേവന്റെ സന്ദേശം അട്ടിമറിക്കപ്പെടുകയാണെന്ന് സ്വാമി സച്ചിദാനന്ദ പറഞ്ഞു. അടുത്ത കാലത്തായി ജാതി പറയണമെന്ന രീതിയിലുള്ള വ്യാഖ്യാനങ്ങൾ ഉണ്ടാകുന്നത് ദുരവസ്ഥയാണ്. മറ്റ് സമുദായങ്ങളെ ആക്ഷേപിക്കുന്ന രീതി ഗുരുവിന്റേതല്ല. ഗുരുവിന്റെ സന്ദേശങ്ങൾ പരിഷ്കരിക്കണമെന്ന നിർദ്ദേശം വരെ വന്നത് ഖേദകരമാണെന്നും അദ്ദേഹം കൂട്ടിച്ചേർത്തു.
നിയമസഭാ തിരഞ്ഞെടുപ്പിൽ കോൺഗ്രസ് പിന്നാക്ക സമുദായങ്ങളെ അവഗണിക്കുകയാണെന്ന് സ്വാമി കുറ്റപ്പെടുത്തി. ജയിക്കുന്ന സീറ്റുകൾ നൽകാതെ തോൽക്കുന്ന സീറ്റുകൾ മാത്രം പിന്നാക്കക്കാർക്ക് നൽകുന്ന രീതിയാണ് ഇപ്പോൾ കാണുന്നത്. എൽഡിഎഫ് മന്ത്രിസഭയിൽ ഒരു സമുദായത്തിൽ നിന്ന് പത്തുപേരുള്ളപ്പോൾ പിന്നാക്കക്കാർക്ക് അർഹമായ പ്രാതിനിധ്യം ലഭിക്കുന്നില്ലെന്നും അദ്ദേഹം പറഞ്ഞു.
കമ്പനി നിയമപ്രകാരം രജിസ്റ്റർ ചെയ്ത എസ്എൻഡിപി യോഗം കഴിഞ്ഞ ഒൻപത് വർഷമായി വാർഷിക റിട്ടേൺ സമർപ്പിച്ചില്ലെന്ന് കണ്ടെത്തിയാണ് വെള്ളാപ്പള്ളി നടേശൻ, തുഷാർ വെള്ളാപ്പള്ളി എന്നിവരടക്കമുള്ള ഡയറക്ടർ ബോർഡ് അംഗങ്ങളെ ഹൈക്കോടതി അയോഗ്യരാക്കിയത്. താൽക്കാലിക ഡയറക്ടർമാരെ നിയമിച്ച് ഭരണം നടത്താൻ സർക്കാരിനോട് കോടതി നിർദ്ദേശിച്ചു. എന്നാൽ വിധിക്കെതിരെ ഉടൻ അപ്പീൽ നൽകുമെന്ന് നിലവിലെ ഭരണസമിതി അറിയിച്ചിട്ടുണ്ട്.
Summary: The Sivagiri Mutt has welcomed the High Court verdict disqualifying SNDP Yogam General Secretary Vellappally Natesan and other board members. Swami Sachidananda stated that the ruling brings relief to followers of Sree Narayana Guru and criticized the current leadership for failing to uphold the Guru’s visions.
