കൊച്ചി: കേരളത്തിലെ പൊതുഗതാഗത രംഗത്ത് പുതിയ ചരിത്രമെഴുതി കെഎസ്ആർടിസി ബിസിനസ് ക്ലാസ് ബസ് സർവീസുകൾ ആരംഭിക്കുന്നു. അത്യാധുനിക സൗകര്യങ്ങളുള്ള ആദ്യ ബസ് ഈ മാസം 15-ന് എത്തുമെന്ന് ഗതാഗത മന്ത്രി കെ.ബി. ഗണേഷ് കുമാർ അറിയിച്ചു. തിരുവനന്തപുരം – കൊച്ചി റൂട്ടിലാകും ആദ്യഘട്ടത്തിൽ സർവീസ് നടത്തുക.(KSRTC with business class bus: Minister KB Ganesh Kumar announces inauguration)
25 യാത്രക്കാർക്ക് മാത്രം സഞ്ചരിക്കാവുന്ന ബസിൽ ടോയ്ലറ്റ്, പാൻട്രി സൗകര്യങ്ങൾ ലഭ്യമായിരിക്കും. ഓരോ സീറ്റിലും വ്യക്തിഗത ടിവി, ചാർജിങ് പോയിന്റ്, വൈഫൈ എന്നിവയുണ്ടാകും. ടിക്കറ്റ് ബുക്ക് ചെയ്യുന്നതിനൊപ്പം ഭക്ഷണവും മുൻകൂട്ടി ഓർഡർ ചെയ്യാം. യാത്രക്കാരുടെ സഹായത്തിനായി ബസ് ഹോസ്റ്റസിന്റെ സേവനവും ലഭ്യമാകും.
ബിസിനസ് ക്ലാസ് സർവീസുകളുടെ ഉദ്ഘാടനം നിർവ്വഹിച്ചതായി മന്ത്രി പ്രഖ്യാപിച്ചു. ബസ് എത്തിയ ഉടൻ താൻ ഓടിച്ചു നോക്കിയ ശേഷം സർവീസ് തുടങ്ങുമെന്നും മന്ത്രി പറഞ്ഞു. ബസ് ഷെഡ്യൂളുകൾ കൃത്യമാക്കാൻ നിർമ്മിത ബുദ്ധിയും ജിപിഎസ് അധിഷ്ഠിത സോഫ്റ്റ്വെയറുകളും ഉപയോഗിക്കും. ചടങ്ങിൽ പങ്കെടുത്ത ഹൈബി ഈഡൻ എംപി മന്ത്രിയെ പ്രശംസിച്ചു.
