ഇടുക്കി: നിയമസഭാ തെരഞ്ഞെടുപ്പിനുള്ള സിപിഎം സ്ഥാനാർത്ഥി പട്ടികയിൽ അപ്രതീക്ഷിത തിരുത്തലുകളുമായി സംസ്ഥാന സെക്രട്ടറിയേറ്റ്. ഇടുക്കിയിലെ കരുത്തനായ നേതാവ് എം.എം. മണിയെ ഇത്തവണ മത്സരരംഗത്ത് നിന്ന് ഒഴിവാക്കി. മണിയുടെ സിറ്റിംഗ് സീറ്റായ ഉടുമ്പൻചോലയിൽ മുൻ എംഎൽഎ കെ.കെ. ജയചന്ദ്രൻ മത്സരിക്കും.(Change in Idukki, MM Mani will not contest in Udumbanchola)
എം.എം. മണിയുടെ പേര് ഉൾപ്പെടുത്തിയാണ് ഇടുക്കി ജില്ലാ നേതൃത്വം പട്ടിക നൽകിയിരുന്നതെങ്കിലും സംസ്ഥാന നേതൃത്വം ഇത് തിരുത്തുകയായിരുന്നു. ഇന്ന് ചേരുന്ന ഇടുക്കി ജില്ലാ സെക്രട്ടറിയേറ്റ് യോഗം ഈ മാറ്റത്തിന് ഔദ്യോഗികമായി അംഗീകാരം നൽകും. എം.എം. മണിക്ക് പുറമെ പാർട്ടിയിലെ പ്രമുഖരായ പല നേതാക്കളും ഇത്തവണ മത്സരരംഗത്തുണ്ടാകില്ലെന്ന് ഉറപ്പായിട്ടുണ്ട്.
മുൻ ആരോഗ്യ മന്ത്രി കെ.കെ. ശൈലജയുടെ സ്ഥാനാർത്ഥിത്വത്തിൽ ജില്ലാ നേതൃത്വത്തിന്റെ നിലപാട് നിർണ്ണായകമാകും. തലമുറ മാറ്റവും പുതുമുഖങ്ങൾക്ക് മുൻഗണന നൽകുന്ന നയവുമാണ് പ്രമുഖരെ ഒഴിവാക്കിയതിലൂടെ സിപിഎം ലക്ഷ്യം വയ്ക്കുന്നത്.
