ടെഹ്റാൻ: അതീവ ഗുരുതരമായ യുദ്ധസാഹചര്യത്തിലും തന്ത്രപ്രധാനമായ ഹോർമുസ് കടലിടുക്ക് അടയ്ക്കാൻ ഇറാൻ ഉദ്ദേശിക്കുന്നില്ലെന്ന് വിദേശകാര്യ മന്ത്രി അബ്ബാസ് അരാഗ്ചി (Strait of Hormuz Iran Update). നിലവിലെ സാഹചര്യത്തിൽ നാവിക ഗതാഗതത്തെയോ രാജ്യാന്തര വ്യാപാരത്തെയോ തടസ്സപ്പെടുത്തുന്ന നീക്കങ്ങൾ ഇറാന്റെ ഭാഗത്തുനിന്നുണ്ടാകില്ലെന്ന് അദ്ദേഹം രാജ്യാന്തര മാധ്യമത്തിന് നൽകിയ അഭിമുഖത്തിൽ പറഞ്ഞു.
പേർഷ്യൻ ഗൾഫിലെ അയൽരാജ്യങ്ങളുമായി ഇറാന് പ്രശ്നങ്ങളില്ല. അമേരിക്കൻ അധിനിവേശത്തിനെതിരായ പ്രതിരോധമാണ് ഇറാൻ നടത്തുന്നത്. സഖ്യകക്ഷികളുടെ സൈനിക കേന്ദ്രങ്ങളെ മാത്രമാണ് തങ്ങൾ ലക്ഷ്യം വെക്കുന്നത്. കൊല്ലപ്പെട്ട ആയത്തുള്ള അലി ഖമനേയിക്ക് പകരമായി പുതിയ പരമോന്നത നേതാവിനെ ഒന്നോ രണ്ടോ ദിവസത്തിനുള്ളിൽ തിരഞ്ഞെടുക്കും. ഭരണഘടനാ സ്ഥാപനങ്ങൾ സുഗമമായി പ്രവർത്തിക്കുന്നുണ്ടെന്നും അദ്ദേഹം അറിയിച്ചു.
ഇറാന്റെ പ്രത്യാക്രമണത്തിൽ യുഎഇ ഉൾപ്പെടെയുള്ള ഗൾഫ് രാജ്യങ്ങളിലെ യുഎസ് താവളങ്ങൾ ലക്ഷ്യം വെച്ചതിനെതിരെ അയൽരാജ്യങ്ങൾ രംഗത്തെത്തിയിരുന്നു. ഇതിന് മറുപടിയായാണ് അയൽക്കാരോട് സൗഹൃദമാണ് ആഗ്രഹിക്കുന്നതെന്ന് അരാഗ്ചി വ്യക്തമാക്കിയത്.
ലോകത്തിലെ എണ്ണവ്യാപാരത്തിന്റെ മൂന്നിലൊന്ന് കടന്നുപോകുന്ന പാതയാണിത്. ഈ കടലിടുക്ക് ഇറാൻ അടച്ചാൽ ആഗോളതലത്തിൽ എണ്ണവില കുതിച്ചുയരുകയും സാമ്പത്തിക പ്രതിസന്ധി ഉണ്ടാവുകയും ചെയ്യും. അതിനാൽ അരാഗ്ചിയുടെ പ്രസ്താവന ആഗോള വിപണിക്ക് നേരിയ ആശ്വാസം നൽകുന്നുണ്ട്.
Story Summary: Iran’s Foreign Minister Abbas Araghchi stated that Tehran has no plans to close the strategic Strait of Hormuz despite the ongoing conflict. He emphasized that Iran seeks friendly ties with neighboring Gulf nations and is only targeting US military interests. Araghchi also confirmed that a new Supreme Leader will be elected within two days following the death of Ayatollah Ali Khamenei.
