കഴക്കൂട്ടം: തിരുവനന്തപുരം ലുലുമാളിന് സമീപം കണ്ടെയ്നർ ലോറിയിൽ നിന്ന് ഗ്രാനൈറ്റ് ഇറക്കുന്നതിനിടെയുണ്ടായ അപകടത്തിൽ അതിഥി തൊഴിലാളി മരിച്ചു (Kazhakkoottam Accident). പശ്ചിമ ബംഗാൾ സ്വദേശി അഭിജിത് ബർമൻ (32) ആണ് മരിച്ചത്. വ്യാഴാഴ്ച പകൽ ഒരു മണിയോടെയാണ് അപകടം നടന്നത്. ലുലുമാളിന് എതിർവശത്തുള്ള നിർമ്മാണത്തിലിരിക്കുന്ന കെട്ടിടത്തിലേക്ക് വിദേശത്ത് നിന്ന് എത്തിച്ച ഗ്രാനൈറ്റുകൾ ഇറക്കുകയായിരുന്നു. ഇതിനിടെ ലോറിയുടെ ഒരു വശം താഴുകയും ഗ്രാനൈറ്റ് പാളങ്ങൾ തൊഴിലാളികളുടെ ദേഹത്തേക്ക് മറിയുകയുമായിരുന്നു. ഗ്രാനൈറ്റ് കട്ടകൾക്കിടയിൽപ്പെട്ട അഭിജിത് സംഭവസ്ഥലത്ത് വെച്ച് തന്നെ മരിച്ചു.
പരിക്കേറ്റ കൃഷ്ണൻ (29), ബിശ്വജിത് (29) എന്നിവരെ അഗ്നിശമന സേനയും നാട്ടുകാരും ചേർന്ന് ഏറെ പരിശ്രമിച്ചാണ് പുറത്തെടുത്തത്. തലയ്ക്കും കാലിനും ഗുരുതരമായി പരിക്കേറ്റ ഇവർ സ്വകാര്യ ആശുപത്രിയിൽ ചികിത്സയിലാണ്. അഗ്നിശമന സേന ഗ്രാനൈറ്റുകൾ നീക്കം ചെയ്താണ് അടിയിൽ കുടുങ്ങിയവരെ പുറത്തെടുത്തത്. സംഭവത്തിൽ പോലീസ് കേസെടുത്ത് അന്വേഷണം ആരംഭിച്ചു.
Story Summary: A 32-year-old migrant worker from West Bengal, Abhijit Barman, died after granite slabs fell on him while unloading a container lorry near Lulu Mall, Kazhakkoottam. Two others, Krishnan and Bishwajit, sustained serious injuries and are hospitalized. The accident occurred when one side of the lorry tilted, causing the imported granite to collapse onto the workers.
