ന്യൂഡൽഹി: ആഗോള ഡിജിറ്റൽ രംഗത്ത് നിർണ്ണായക ചുവടുവെപ്പുമായി ഇന്ത്യയും അയർലൻഡും കൈകോർക്കുന്നു. കേന്ദ്ര വാർത്താവിനിമയ മന്ത്രി ജ്യോതിരാദിത്യ സിന്ധ്യയും അയർലൻഡ് മന്ത്രി ജാക്ക് ചേംബേഴ്സും തമ്മിൽ നടത്തിയ ഉന്നതതല കൂടിക്കാഴ്ചയിലാണ് ഇരുരാജ്യങ്ങളും തമ്മിലുള്ള സാങ്കേതിക സഹകരണം വർദ്ധിപ്പിക്കാൻ ധാരണയായത്.(India and Ireland Strengthening cooperation in the technology sector)
കഴിഞ്ഞ പത്ത് വർഷത്തിനിടെ ഇന്ത്യ ഡിജിറ്റൽ മേഖലയിൽ കൈവരിച്ച വൻ മുന്നേറ്റങ്ങൾ ഐറിഷ് പ്രതിനിധികൾക്ക് മുന്നിൽ ജ്യോതിരാദിത്യ സിന്ധ്യ അവതരിപ്പിച്ചു. യുപിഐ, ഡയറക്ട് ബെനഫിറ്റ് ട്രാൻസ്ഫർ എന്നിവയിലൂടെ ഇന്ത്യ നടപ്പിലാക്കിയ വിപ്ലവകരമായ മാറ്റങ്ങൾ അദ്ദേഹം വിശദീകരിച്ചു. രാജ്യത്തെ അതിവേഗ 5ജി വ്യാപനത്തെക്കുറിച്ചും ഗ്രാമീണ മേഖലകളിൽ ബ്രോഡ്ബാൻഡ് എത്തിക്കുന്നതിനുള്ള പദ്ധതികളെക്കുറിച്ചും ചർച്ചകൾ നടന്നു.
അടുത്ത ഘട്ടമെന്ന നിലയിൽ അതിനൂതന സാങ്കേതിക വിദ്യകളിൽ ഒന്നിച്ചു പ്രവർത്തിക്കാൻ ഇരുരാജ്യങ്ങളും തീരുമാനിച്ചു. പ്രധാനമായും ആർട്ടിഫിഷ്യൽ ഇന്റലിജൻസ്, ക്വാണ്ടം കമ്മ്യൂണിക്കേഷൻസ്, റെഗുലേറ്ററി ഇന്നൊവേഷൻ എന്നീ മേഖലകളിലാണ് സഹകരണം ഉറപ്പാക്കുക. 2030-ൽ നടക്കാനിരിക്കുന്ന ഐടിയു പ്ലീനറി കോൺഫറൻസിന് ആതിഥേയത്വം വഹിക്കാൻ ഇന്ത്യ അന്താരാഷ്ട്ര പിന്തുണ തേടുകയാണ്.
