മുംബൈ: വാഹനങ്ങൾ നിയമാനുസൃതമായ വേഗതയിൽ പോകുമ്പോൾ എ ആർ റഹ്മാന്റെ വിഖ്യാതമായ ‘ജയ് ഹോ’ എന്ന ഗാനം മുഴങ്ങിക്കേൾക്കുന്ന മുംബൈ കോസ്റ്റൽ റോഡിലെ മ്യൂസിക്കൽ സ്ട്രെച്ച് പ്രദേശവാസികൾക്ക് വിനയാകുന്നു (Jai Ho Song Coastal Road Controversy). രാവിലെ 6 മണി മുതൽ അർദ്ധരാത്രി വരെ നീളുന്ന ഈ സംഗീതം തങ്ങളുടെ സ്വൈര്യജീവിതം തകർക്കുന്നുവെന്ന് ആരോപിച്ച് ബ്രീച്ച് കാൻഡി നിവാസികൾ രംഗത്തെത്തി. ട്രാഫിക് നിയമങ്ങൾ പാലിക്കുന്നവർക്ക് ഒരു ‘സംഗീത സമ്മാനം’ എന്ന നിലയിലാണ് അധികൃതർ ഈ പദ്ധതി നടപ്പിലാക്കിയത്.
എന്നാൽ, 650-ലധികം കുടുംബങ്ങൾ താമസിക്കുന്ന ഈ മേഖലയിൽ വലിയ ശബ്ദമലിനീകരണമാണ് ഇത് ഉണ്ടാക്കുന്നതെന്ന് പ്രദേശവാസികൾ പരാതിപ്പെടുന്നു. വീടുകളുടെ ജനാലകൾ അടച്ചിട്ടാൽ പോലും ഈ ശബ്ദം അലോസരപ്പെടുത്തുന്നുവെന്നും ഇത് മുതിർന്ന പൗരന്മാരുടെ ഉറക്കത്തെയും ആരോഗ്യത്തെയും ബാധിക്കുന്നുവെന്നും അവർ പറയുന്നു. ബ്രീച്ച് കാൻഡി റസിഡന്റ്സ് ഫോറം മുനിസിപ്പൽ കമ്മീഷണർക്കും മഹാരാഷ്ട്ര മുഖ്യമന്ത്രിയുടെ ഓഫീസിനും ഇത് സംബന്ധിച്ച് ഔദ്യോഗികമായി പരാതി നൽകിയിട്ടുണ്ട്.
സംഗീതം ഡ്രൈവർമാരുടെ ശ്രദ്ധ തിരിക്കാനും അപകടങ്ങൾ ഉണ്ടാകാനും സാധ്യതയുണ്ടെന്നും നാട്ടുകാർ ചൂണ്ടിക്കാട്ടുന്നു. ഹൈസ്പീഡ് റോഡിൽ ഇത്തരം ശബ്ദങ്ങൾ സുരക്ഷാ ഭീഷണിയാണെന്നാണ് ഇവരുടെ പക്ഷം. പ്രതിഷേധം ശക്തമായതോടെ ഈ സംഗീത സംവിധാനം നിർത്തലാക്കുമോ അതോ സമയക്രമത്തിൽ മാറ്റം വരുത്തുമോ എന്ന കാര്യത്തിൽ അധികൃതർ ഇതുവരെ തീരുമാനമെടുത്തിട്ടില്ല.
Summary: The musical stretch on Mumbai’s Coastal Road, which plays the tune ‘Jai Ho’ when cars drive at a specific speed, has sparked outrage among local residents.
