ന്യൂഡൽഹി: ഇന്ത്യ ആതിഥേയത്വം വഹിക്കാനിരിക്കുന്ന 2029-ലെ ചാമ്പ്യൻസ് ട്രോഫിയും 2031-ലെ ഏകദിന ലോകകപ്പും രാജ്യത്തിന് നഷ്ടമായേക്കുമെന്ന് റിപ്പോർട്ടുകൾ (ICC World Cup). നിലവിൽ നടന്നുകൊണ്ടിരിക്കുന്ന ടി20 ലോകകപ്പുമായി ബന്ധപ്പെട്ട രാഷ്ട്രീയ തർക്കങ്ങളെത്തുടർന്ന് വേദികൾ ഓസ്ട്രേലിയയിലേക്ക് മാറ്റുന്ന കാര്യം ഐസിസി സജീവമായി പരിഗണിക്കുന്നതായി സിഡ്നി മോണിംഗ് ഹെറാൾഡ് റിപ്പോർട്ട് ചെയ്തു.
ബംഗ്ലാദേശുമായുള്ള ഐപിഎൽ തർക്കങ്ങളും സുരക്ഷാ കാരണങ്ങളാൽ ബംഗ്ലാദേശ് ടൂർണമെന്റിൽ നിന്ന് പിന്മാറിയതും സൃഷ്ടിച്ച അനിശ്ചിതത്വമാണ് ഐസിസിയെ മാറി ചിന്തിക്കാൻ പ്രേരിപ്പിക്കുന്നത്. പാകിസ്ഥാനും ബംഗ്ലാദേശും ഇന്ത്യയിൽ കളിക്കാൻ വിമുഖത കാണിക്കുന്നത് ടൂർണമെന്റുകളുടെ നടത്തിപ്പിനെയും ഏകദേശം 250 ദശലക്ഷം ഡോളറോളം വരുന്ന സംപ്രേക്ഷണ വരുമാനത്തെയും ബാധിക്കുമെന്ന ആശങ്കയിലാണ് ഐസിസി. നിലവിലെ ഹൈബ്രിഡ് മോഡൽ പ്രകാരം ഇന്ത്യയും പാകിസ്ഥാനും പരസ്പരം രാജ്യങ്ങളിൽ കളിക്കുന്നില്ല.
ഇന്ത്യ-പാകിസ്ഥാൻ മത്സരങ്ങൾ വൻ ജനപങ്കാളിത്തത്തോടെയും സുരക്ഷിതമായും നടത്താൻ സാധിക്കുമെന്ന് ഓസ്ട്രേലിയ നേരത്തെ തെളിയിച്ചിട്ടുണ്ട്. കൂടാതെ, ഓസ്ട്രേലിയയിലെ സമയക്രമം ഇന്ത്യൻ ടെലിവിഷൻ വിപണിക്ക് അനുയോജ്യമാണെന്നതും ഐസിസിയുടെ ഈ നീക്കത്തിന് പിന്നിലുണ്ട്. ഇന്ത്യയും ബംഗ്ലാദേശും സംയുക്തമായാണ് 2031-ലെ ലോകകപ്പിന് വേദിയാകേണ്ടിയിരുന്നത്. എന്നാൽ ബംഗ്ലാദേശിലെ രാഷ്ട്രീയ മാറ്റങ്ങളും ഇന്ത്യയുമായുള്ള തർക്കങ്ങളും ഈ സാധ്യതകളെ തുലാസിലാക്കിയിരിക്കുകയാണ്.
Summary:
India is at risk of losing the hosting rights for the 2029 Champions Trophy and the 2031 ODI World Cup due to ongoing political tensions and scheduling uncertainties.
