ചെന്നൈ: ഹോട്ടലിൽ മലയാളി യുവനടിയോട് അപമര്യാദയായി പെരുമാറാൻ ശ്രമിച്ച ജീവനക്കാരൻ പിടിയിൽ. നാഗപട്ടണം സ്വദേശിയായ സയിദ് അഫ്രീദി (20) ആണ് പോലീസിന്റെ പിടിയിലായത്. കോളജ് വിദ്യാർത്ഥിയായ ഇയാൾ ഹോട്ടലിൽ പാർട്ട് ടൈം ജീവനക്കാരനായി ജോലി ചെയ്തു വരികയായിരുന്നു.(Hotel employee arrested in Chennai for attempting to misbehave with Malayali actress)
ശനിയാഴ്ച രാത്രി ചെന്നൈയിലെ ടി. നഗറിലുള്ള പ്രമുഖ ഹോട്ടലിലാണ് കേസിനാസ്പദമായ സംഭവം നടന്നത്. നടിയുടെ മുറിയിലെ ഇന്റർകോം ഫോൺ തകരാറിലായതിനെ തുടർന്ന് ഇത് നന്നാക്കാനാണ് സയിദ് അഫ്രീദി മുറിയിലെത്തിയത്.
ഫോൺ നന്നാക്കിയ ശേഷം നടിയോട് സെൽഫി എടുക്കാൻ ഇയാൾ ആവശ്യപ്പെട്ടു. ഇതിന് പിന്നാലെ നടിയെ ആലിംഗനം ചെയ്യാൻ ശ്രമിച്ചതായാണ് പരാതി. നടി ബഹളം വെച്ചതോടെ ഇയാൾ മുറിയിൽ നിന്ന് ഓടി രക്ഷപ്പെടുകയായിരുന്നു.തുടർന്ന് നടി ഹോട്ടൽ അധികൃതരെയും പോലീസിനെയും വിവരമറിയിച്ചു. നടിയുടെ പരാതിയിൽ കേസെടുത്ത പോലീസ് ഇയാളെ അറസ്റ്റ് ചെയ്തു.
