തൃശൂർ: ബംഗളൂരുവിൽ നിന്ന് കേരളത്തിലേക്ക് കടത്തുകയായിരുന്ന ലക്ഷങ്ങൾ വിലമതിക്കുന്ന മയക്കുമരുന്നുമായി രണ്ട് യുവാക്കൾ പിടിയിൽ (Thrissur Drug Bust). കുന്നംകുളം ചെറുവത്തൂർ സ്വദേശി റിവിൻസ് (24), അടുപ്പുട്ടി മുകുളശേരി സ്വദേശി അക്ഷയ് (24) എന്നിവരെയാണ് തൃശൂർ സിറ്റി പോലീസിന്റെ ഡാൻസാഫ് (DANSAF) സംഘം പിടികൂടിയത്.
പ്രതികൾ ബംഗളൂരുവിൽ നിന്ന് മയക്കുമരുന്നുമായി വരുന്നുണ്ടെന്ന രഹസ്യവിവരത്തെത്തുടർന്ന് പീച്ചി സ്റ്റേഷൻ പരിധിയിൽ വെച്ചാണ് പോലീസ് ഇവരെ തടഞ്ഞത്. ഇവരുടെ പക്കൽ നിന്ന് 555 ഗ്രാം എംഡിഎംഎ കണ്ടെടുത്തു. വിപണിയിൽ ഇതിന് ഏകദേശം 15 ലക്ഷം രൂപ വിലവരും.
നിയമസഭാ തിരഞ്ഞെടുപ്പിന് മുന്നോടിയായി തൃശൂർ സിറ്റി പോലീസ് കമ്മീഷണർ നകുൽ രാജേന്ദ്ര ദേശ്മുഖിന്റെ നിർദ്ദേശപ്രകാരം ജില്ലയിൽ സുരക്ഷാ പരിശോധനകൾ കർശനമാക്കിയിരുന്നു. ഇതിന്റെ ഭാഗമായി നടന്ന പരിശോധനയിലാണ് പ്രതികൾ കുടുങ്ങിയത്.
പ്രതികളുടെ സാമ്പത്തിക സ്രോതസ്സുകളെക്കുറിച്ചും ഈ ശൃംഖലയിൽ കൂടുതൽ പേർക്ക് പങ്കുണ്ടോ എന്നതിനെക്കുറിച്ചും വിശദമായ അന്വേഷണം ആരംഭിച്ചതായി പോലീസ് കമ്മീഷണർ വ്യക്തമാക്കി.
പ്രതികളെ കോടതിയിൽ ഹാജരാക്കി റിമാൻഡ് ചെയ്യാനുള്ള നടപടികൾ പുരോഗമിക്കുകയാണ്. ലഹരിമരുന്ന് കടത്തിനെതിരെ ജില്ലയിൽ വരും ദിവസങ്ങളിലും കർശന പരിശോധന തുടരുമെന്ന് പോലീസ് അറിയിച്ചു.
