ചെറുവത്തൂർ: ചെറുവത്തൂർ പഴയ ചെക്ക് പോസ്റ്റിന് സമീപം ഞായറാഴ്ച വൈകുന്നേരമുണ്ടായ തീപിടുത്തത്തിൽ മോട്ടോർ വാഹന വകുപ്പ് (RTO) കസ്റ്റഡിയിലെടുത്ത് സൂക്ഷിച്ചിരുന്ന വാഹനങ്ങൾ കത്തിനശിച്ചു. വൈകുന്നേരം അഞ്ച് മണിയോടെയാണ് സംഭവം (Cheruvathur fire).
ഴയ ചെക്ക് പോസ്റ്റ് പരിസരത്തും തൊട്ടടുത്തുള്ള രാമകൃഷ്ണന്റെ പറമ്പിലുമാണ് തീ പടർന്നത്. കടുത്ത ചൂടിനെത്തുടർന്ന് പറമ്പിലെ കരിയിലകൾക്കും ഉണങ്ങിയ പുല്ലിനും തീ പിടിച്ചതാകാമെന്നാണ് പ്രാഥമിക നിഗമനം. ആർടിഒ അധികൃതർ നിയമലംഘനങ്ങളെത്തുടർന്ന് പിടിച്ചുവെച്ചിരുന്ന ഒരു ലോറിയും വാനും തീപിടുത്തത്തിൽ പൂർണ്ണമായും നശിച്ചു. കാടുപിടിച്ചു കിടന്ന പ്രദേശമായതിനാൽ തീ അതിവേഗം വാഹനങ്ങളിലേക്ക് പടരുകയായിരുന്നു.
വിവരമറിഞ്ഞ് തൃക്കരിപ്പൂരിൽ നിന്നും അഗ്നിരക്ഷാസേന സ്ഥലത്തെത്തി. ഏറെ നേരത്തെ പരിശ്രമത്തിനൊടുവിലാണ് തീ പൂർണ്ണമായും അണയ്ക്കാനായത്. സമീപത്തെ കെട്ടിടങ്ങളിലേക്കും മറ്റ് വാഹനങ്ങളിലേക്കും തീ പടരാതിരുന്നത് വലിയ അപകടം ഒഴിവാക്കി. സംഭവത്തിൽ പോലീസ് അന്വേഷണം ആരംഭിച്ചിട്ടുണ്ട്.
