ഫ്ലോറിഡ: അമേരിക്കയിലെ സൗത്ത് ഫ്ലോറിഡയിലുള്ള പ്രശസ്തമായ പാം ബീച്ച് അന്താരാഷ്ട്ര വിമാനത്താവളത്തിന്റെ പേര് ഔദ്യോഗികമായി മാറ്റി. യുഎസ് പ്രസിഡന്റ് ഡൊണാൾഡ് ട്രംപിനോടുള്ള ആദരസൂചകമായി ‘പ്രസിഡന്റ് ഡൊണാൾഡ് ജെ. ട്രംപ് ഇന്റർനാഷണൽ എയർപോർട്ട്’ എന്നാണ് വിമാനത്താവളത്തിന് പുതിയ പേര് നൽകിയിരിക്കുന്നത്.(Palm Beach International Airport renamed President Donald J Trump International Airport)
പേര് മാറ്റത്തിന് അനുമതി നൽകുന്ന ബില്ലിൽ ഫ്ലോറിഡ ഗവർണർ റോൺ ഡിസാന്റിസ് നേരത്തെ ഒപ്പുവെച്ചിരുന്നു. പേര് മാറ്റിയതിന് ശേഷം വിമാനത്താവളത്തിൽ ആദ്യമായി ലാൻഡ് ചെയ്തത് ട്രംപ് ഓർഗനൈസേഷന്റെ ഉടമസ്ഥതയിലുള്ള ‘ട്രംപ് ഫോഴ്സ് വൺ’ (Boeing 757) വിമാനമാണ്. വ്യാഴാഴ്ച പുലർച്ചെ അഞ്ച് മണിയോടെ ട്രംപിന്റെ മകൻ എറിക് ട്രംപുമായി എത്തിയതായിരുന്നു ഈ വിമാനം. ഫ്ലോറിഡയ്ക്കും രാജ്യത്തിനും വേണ്ടി വലിയ സംഭാവനകൾ നൽകിയ തന്റെ പിതാവിന് ലഭിച്ച ഏറ്റവും വലിയ ആദരമാണിതെന്ന് എറിക് ട്രംപ് എക്സ് (X) പ്ലാറ്റ്ഫോമിൽ കുറിച്ചു.
വിമാനത്താവളത്തിന്റെ ഔദ്യോഗിക നാമം വ്യാഴാഴ്ച മുതൽ മാറിയെങ്കിലും, യാത്രക്കാർ ടിക്കറ്റ് ബുക്കിംഗിനും ലഗേജ് ടാഗുകൾക്കുമായി ഉപയോഗിക്കുന്ന മൂന്നക്ഷരമുള്ള ഐഎടിഎ (IATA) എയർപോർട്ട് കോഡ് നിലവിൽ ‘PBI’ എന്ന് തന്നെ തുടരും. ആഗസ്റ്റ് 18 മുതൽ ഈ കോഡ് ട്രംപിന്റെ പേരിന്റെ ആദ്യക്ഷരങ്ങൾ ചേർത്ത ‘DJT’ എന്നതിലേക്ക് ഔദ്യോഗികമായി മാറും. വിമാനത്താവളത്തിലെ സൈൻ ബോർഡുകളും ബ്രാൻഡിംഗും മാറ്റുന്നതിനായി ഏകദേശം 5.5 ദശലക്ഷം ഡോളർ ചെലവ് വരുമെന്നാണ് അധികൃതർ കണക്കാക്കുന്നത്. പൊതു അടിസ്ഥാന സൗകര്യങ്ങൾക്ക് ട്രംപിന്റെ പേര് നൽകുന്നതിന്റെ ഭാഗമായി ടെന്നസിയിലെ ഐ-40 ഹൈവേയിലുള്ള ഒരു പാലത്തിന് ‘ഡൊണാൾഡ് ജെ. ട്രംപ് ബ്രിഡ്ജ്’ എന്നും ഇതേ ദിവസം പേരിട്ടിട്ടുണ്ട്.
Story Summary
Florida’s Palm Beach International Airport has been officially renamed the President Donald J. Trump International Airport, following legislation signed by Governor Ron DeSantis. The first flight to land under the new name was the family’s private jet, “Trump Force One,” carrying Eric Trump. While the physical rebranding is underway, the airport’s three-letter passenger code will formally change from PBI to DJT on August 18, 2026.
