ന്യൂയോർക്ക്: കുപ്രസിദ്ധ ലൈംഗിക കുറ്റവാളി ജെഫ്രി എപ്സ്റ്റീൻ, ശതകോടീശ്വരൻ ലിയോൺ ബ്ലാക്കിന്റെ സാമ്പത്തിക ഇടപാടുകളിലും വ്യക്തിബന്ധങ്ങളിലും നിർണ്ണായകമായ ഇടനിലക്കാരനായി പ്രവർത്തിച്ചിരുന്നതായി പുതിയ വെളിപ്പെടുത്തൽ (Jeffrey Epstein Leon Black Financial Scandal). ആറുവർഷത്തിനിടെ സാമ്പത്തിക ഉപദേശങ്ങൾക്കായി ലിയോൺ ബ്ലാക്ക് എപ്സ്റ്റീന് 170 മില്യൺ ഡോളർ (ഏകദേശം 1,400 കോടി രൂപ) നൽകിയതായി യുഎസ് നീതിന്യായ വകുപ്പ് പുറത്തുവിട്ട രേഖകൾ വ്യക്തമാക്കുന്നു.
ബ്ലാക്കുമായി ബന്ധമുള്ള സ്ത്രീകൾക്ക് പണം കൈമാറാൻ എപ്സ്റ്റീൻ വഴിയൊരുക്കിയതായാണ് ഇമെയിൽ രേഖകൾ സൂചിപ്പിക്കുന്നത്. ഏകദേശം 20 മില്യൺ ഡോളറോളം പല സ്ത്രീകൾക്കായി ബ്ലാക്ക് കൈമാറിയിട്ടുണ്ട്. നികുതി ബാധ്യതകൾ കുറയ്ക്കാനും ഈ പണമിടപാടുകൾ രഹസ്യമായി വെക്കാനും എപ്സ്റ്റീൻ സഹായിച്ചിരുന്നു. ബ്ലാക്കിനെതിരെ ഉയർന്ന ബലാത്സംഗം, പീഡന ആരോപണങ്ങൾ ഒത്തുതീർപ്പാക്കുന്നതിലും എപ്സ്റ്റീൻ മുഖ്യ പങ്കുവഹിച്ചു. ഒരു മുൻ പങ്കാളി ഉന്നയിച്ച 100 മില്യൺ ഡോളറിന്റെ അവകാശവാദം 18 മില്യൺ ഡോളറിന് ഒത്തുതീർപ്പാക്കാൻ എപ്സ്റ്റീനാണ് തന്ത്രങ്ങൾ മെനഞ്ഞത്.
എന്നാൽ, ഈ ആരോപണങ്ങളെല്ലാം ലിയോൺ ബ്ലാക്കിന്റെ അഭിഭാഷകർ നിഷേധിച്ചു. താൻ ഒരു സ്ത്രീയെയും പീഡിപ്പിച്ചിട്ടില്ലെന്നും എപ്സ്റ്റീൻ തന്റെ സ്വാധീനം വർദ്ധിപ്പിച്ചു കാണിക്കാൻ നുണകൾ പറഞ്ഞതാണെന്നും ബ്ലാക്ക് വാദിക്കുന്നു. 1990-കളിൽ ആരംഭിച്ച ഇവരുടെ സൗഹൃദം പിന്നീട് വലിയ ബിസിനസ് ഇടപാടുകളിലേക്ക് വളരുകയായിരുന്നു. 2019-ൽ ലൈംഗികക്കടത്ത് കേസിൽ അറസ്റ്റിലായ എപ്സ്റ്റീൻ വിചാരണ കാത്തിരിക്കെ ജയിലിൽ വെച്ച് ആത്മഹത്യ ചെയ്തിരുന്നു.
Summary
Newly released Justice Department documents reveal that convicted sex offender Jeffrey Epstein acted as a middleman for billionaire Leon Black’s financial and personal dealings. Over six years, Black paid Epstein $170 million for financial advice, but records show Epstein also managed payments to women connected to Black and helped settle abuse allegations. While Black denies any wrongdoing and claims Epstein exaggerated their relationship, the documents highlight their extensive cooperation in tax avoidance and private settlements.
