വാഷിങ്ടൺ/ ടെൽ അവീവ്: യുഎസും ഇറാനും തമ്മിൽ ഒപ്പുവെച്ച വെടിനിർത്തൽ കരാറിനെച്ചൊല്ലി ഇസ്രയേലിന് കടുത്ത അതൃപ്തിയെന്ന് റിപ്പോർട്ട് (US Iran Ceasefire Agreement 2026). തങ്ങളുമായി വേണ്ടത്ര കൂടിയാലോചനകൾ നടത്താതെയും ചർച്ചകളിൽ നിന്ന് മാറ്റിനിർത്തിയും എടുത്ത തീരുമാനത്തിൽ ഇസ്രയേൽ ഭരണകൂടം അമർഷത്തിലാണെന്ന് ‘വാൾസ്ട്രീറ്റ് ജേണൽ’ റിപ്പോർട്ട് ചെയ്യുന്നു.
വെടിനിർത്തൽ കരാറിലെത്താനുള്ള തീരുമാനം ഇസ്രയേലിനെ മുൻകൂട്ടി അറിയിച്ചിരുന്നില്ലെന്നാണ് പുറത്തുവരുന്ന വിവരം. തീരുമാനമെടുക്കുന്ന ചർച്ചകളിൽ നിന്ന് ഇസ്രയേൽ പ്രതിനിധികളെ അമേരിക്ക ബോധപൂർവം ഒഴിവാക്കിയെന്നും റിപ്പോർട്ടുകൾ സൂചിപ്പിക്കുന്നു.
ഡൊണാൾഡ് ട്രംപ് നൽകിയ അന്ത്യശാസനം അവസാനിക്കാൻ വെറും 90 മിനിറ്റ് ബാക്കിനിൽക്കെയായിരുന്നു യുഎസും ഇറാനും തമ്മിൽ രണ്ടാഴ്ചത്തെ താത്കാലിക വെടിനിർത്തലിന് ധാരണയായത്.കരാർ പ്രകാരം ഹോർമുസ് കടലിടുക്ക് തുറക്കാനും ധാരണയുണ്ടായിരുന്നു.
വെടിനിർത്തൽ കരാറിനെ പ്രധാനമന്ത്രി ബെഞ്ചമിൻ നെതന്യാഹു പിന്തുണയ്ക്കുന്നുണ്ടെങ്കിലും അതിൽ ചില നിബന്ധനകൾ അദ്ദേഹം മുന്നോട്ടുവെച്ചു. ഈ കരാർ ഇറാനുമാത്രമുള്ളതാണെന്നും ലെബനൻ ഇതിന്റെ പരിധിയിൽ വരില്ലെന്നുമാണ് നെതന്യാഹുവിന്റെ പക്ഷം. ഇതിന് പിന്നാലെ ഹിസ്ബുള്ളയെ ലക്ഷ്യമിട്ട് ലെബനനിൽ ഇസ്രയേൽ ശക്തമായ ആക്രമണം തുടരുകയും ചെയ്തു.
മറുഭാഗത്ത്, ലെബനനിൽ ഇസ്രയേൽ ആക്രമണം തുടർന്നാൽ കരാറിൽ നിന്ന് പിന്മാറുമെന്ന് ഇറാനും ഭീഷണി മുഴക്കി. ഇതിന്റെ ഭാഗമായി ഹോർമുസ് കടലിടുക്കിലൂടെയുള്ള കപ്പൽ ഗതാഗതം ഇറാൻ തടഞ്ഞതായും റിപ്പോർട്ടുകളുണ്ട്.
ഇസ്രയേലിന്റെ ലെബനനിലെ സൈനിക നീക്കം കരാറിന്റെ ഭാഗമല്ലെന്ന് യുഎസ് പ്രസിഡന്റ് ഡൊണാൾഡ് ട്രംപ് നേരത്തെ വ്യക്തമാക്കിയിരുന്നു. ഹിസ്ബുള്ളയുടെ സാന്നിധ്യം കാരണമാണ് ലെബനനെ കരാറിൽ ഉൾപ്പെടുത്താത്തതെന്നും ഇസ്രയേൽ അവിടെ നടത്തുന്നത് പ്രത്യേക ഏറ്റുമുട്ടലാണെന്നുമാണ് ട്രംപിന്റെ വിലയിരുത്തൽ. സഖ്യകക്ഷിയായ ഇസ്രയേലിനെ വിശ്വാസത്തിലെടുക്കാതെ അമേരിക്ക നടത്തിയ നീക്കം ഇരുരാജ്യങ്ങളും തമ്മിലുള്ള ബന്ധത്തിൽ വിള്ളലുണ്ടാക്കുമോ എന്നാണ് നയതന്ത്ര വിദഗ്ധർ ഉറ്റുനോക്കുന്നത്.
Story Summary:
Israel has expressed strong dissatisfaction over the US-Iran ceasefire agreement, reportedly feeling sidelined during the negotiations. According to the Wall Street Journal, the US finalized the deal without consulting its key ally, Israel. While the two-week temporary ceasefire was reached just 90 minutes before Donald Trump’s deadline, Israel maintains that the deal does not cover Lebanon. Consequently, Israel continued its strikes against Hezbollah, leading Iran to threaten withdrawal from the pact and block the Strait of Hormuz. President Trump defended the exclusion of Lebanon, citing the conflict with Hezbollah as a separate issue.
