ജെറുസലേം: ലബനനിലെ കൂടുതൽ തന്ത്രപ്രധാനമായ പ്രദേശങ്ങൾ പിടിച്ചെടുക്കാൻ ഇസ്രായേൽ പ്രതിരോധ മന്ത്രി ഇസ്രായേൽ കാറ്റ്സ് സൈന്യത്തിന് ഉത്തരവ് നൽകി (Israel Troops Seize Lebanon Positions). ഇസ്രായേൽ അതിർത്തി ഗ്രാമങ്ങൾക്ക് നേരെയുള്ള ഹിസ്ബുള്ളയുടെ ആക്രമണം തടയുന്നതിനായി കൂടുതൽ നിയന്ത്രണ മേഖലകൾ സ്ഥാപിക്കാനാണ് ഈ നീക്കമെന്ന് അദ്ദേഹം എക്സിലൂടെ വ്യക്തമാക്കി. പ്രധാനമന്ത്രി ബെഞ്ചമിൻ നെതന്യാഹുവും താനും ചേർന്നാണ് സൈനിക മുന്നേറ്റത്തിന് അനുമതി നൽകിയതെന്നും അദ്ദേഹം കൂട്ടിച്ചേർത്തു. ലബനനിലെ ഹിസ്ബുള്ള കേന്ദ്രങ്ങൾ ലക്ഷ്യമിട്ട് ഇസ്രായേൽ സൈന്യം അതിശക്തമായ ആക്രമണം തുടരുകയാണ്.
തെക്കൻ ലബനനിൽ ഒരു ‘സുരക്ഷാ മേഖല’ സ്ഥാപിക്കുക എന്ന ലക്ഷ്യത്തോടെയാണ് ഇസ്രായേൽ സൈന്യം കരയുദ്ധം ആരംഭിച്ചിരിക്കുന്നത്. ഇസ്രായേൽ സൈനികർ അതിർത്തി കടന്ന് ലബനൻ മണ്ണിലേക്ക് പ്രവേശിച്ചതായും ഹിസ്ബുള്ളയുടെ തുരങ്കങ്ങളും ആയുധപ്പുരകളും തകർക്കാൻ ലക്ഷ്യമിട്ടുള്ള നീക്കങ്ങളാണ് നടക്കുന്നതെന്നും ഇസ്രായേൽ സൈനിക വക്താവ് അറിയിച്ചു. ലബനനിലെ ജനങ്ങളോട് സുരക്ഷിത സ്ഥാനങ്ങളിലേക്ക് മാറാൻ ഇസ്രായേൽ ഇതിനോടകം മുന്നറിയിപ്പ് നൽകിയിട്ടുണ്ട്. ബെെയ്റൂട്ട് ഉൾപ്പെടെയുള്ള നഗരങ്ങളിൽ വ്യോമാക്രമണം തുടരുന്നത് സ്ഥിതിഗതികൾ അതീവ ഗുരുതരമാക്കിയിരിക്കുകയാണ്.
ഈ പുതിയ സൈനിക നീക്കം പശ്ചിമേഷ്യയിലെ യുദ്ധം കൂടുതൽ രാജ്യങ്ങളിലേക്ക് പടരുന്നതിന്റെ സൂചനയാണ് നൽകുന്നത്. ഇറാനിലെ വ്യോമപ്രതിരോധ സംവിധാനങ്ങൾക്ക് നേരെ ഇസ്രായേൽ ആക്രമണം തുടരുന്നതിനിടയിലാണ് ലബനനിലും കരയുദ്ധം കടുപ്പിക്കുന്നത്. യുഎസ് പൗരന്മാരോട് ഉടൻ മടങ്ങാൻ അമേരിക്ക നിർദ്ദേശിച്ച 15 രാജ്യങ്ങളിൽ ലബനനും ഉൾപ്പെടുന്നു. ലബനനിൽ ജോലി ചെയ്യുന്ന നിരവധി മലയാളി പ്രവാസികൾ ഈ സാഹചര്യത്തിൽ വലിയ ആശങ്കയിലാണ്. വിമാന സർവീസുകൾ മുടങ്ങിയതും യാത്രാ തടസ്സങ്ങളും കാരണം പലർക്കും സുരക്ഷിത സ്ഥാനങ്ങളിലേക്ക് മാറാൻ കഴിയാത്ത അവസ്ഥയാണുള്ളത്.
