ടെഹ്റാൻ: ഇറാനെ ആക്രമിച്ച് ‘ശിലായുഗത്തിലേക്ക്’ (Stone Age) തിരിച്ചയക്കുമെന്ന അമേരിക്കൻ പ്രസിഡന്റ് ഡോണൾഡ് ട്രംപിന്റെയും പ്രതിരോധ സെക്രട്ടറി പീറ്റ് ഹെഗ്സെത്തിന്റെയും ഭീഷണിക്ക് കടുത്ത ഭാഷയിൽ മറുപടി നൽകി ഇറാൻ (Iran US Conflict 2026). വെറും 250 വർഷത്തെ മാത്രം ചരിത്രമുള്ള അമേരിക്ക, 6,000 വർഷത്തിലധികം പഴക്കമുള്ള ഒരു നാഗരികതയെ ഭീഷണിപ്പെടുത്തുന്നത് ഹോളിവുഡ് സിനിമകളിലെ വ്യാമോഹം കൊണ്ടാണെന്ന് ഇസ്ലാമിക് റെവല്യൂഷണറി ഗാർഡ് കോർപ്സ് (IRGC) കമാൻഡർ ബ്രിഗേഡിയർ ജനറൽ സയ്യിദ് മജീദ് മൂസാവി പരിഹസിച്ചു.
ഹോർമുസ് കടലിടുക്ക് ഉപരോധിച്ചതുമായി ബന്ധപ്പെട്ട് ഇരുരാജ്യങ്ങളും തമ്മിലുള്ള തർക്കം നിലനിൽക്കുന്ന സാഹചര്യത്തിലാണ് പ്രകോപനപരമായ പ്രസ്താവനകൾ പുറത്തുവരുന്നത്.ഹോർമുസ് കടലിടുക്ക് തുറക്കുന്നത് വരെ ഇറാനെ ബോംബിട്ട് തകർക്കുമെന്നും ശിലായുഗത്തിലേക്ക് തള്ളുമെന്നും ട്രംപ് മുന്നറിയിപ്പ് നൽകിയിരുന്നു. ഇതിന് പിന്നാലെ ‘ബാക്ക് ടു ദ സ്റ്റോൺ ഏജ്’ (Back to the Stone Age) എന്ന് പ്രതിരോധ സെക്രട്ടറി പീറ്റ് ഹെഗ്സെത്തും എക്സ് പ്ലാറ്റ്ഫോമിൽ കുറിച്ചു.
അമേരിക്ക തങ്ങളുടെ സൈനികരെ ശിലായുഗത്തിലേക്കല്ല, മറിച്ച് ശ്മശാനങ്ങളിലേക്കാണ് കൊണ്ടുപോകുന്നതെന്ന് ജനറൽ മൂസാവി തിരിച്ചടിച്ചു. ലോകത്തിലെ ഏറ്റവും പുരാതനമായ സംസ്കാരങ്ങളിലൊന്നായ ഇറാനെ തകർക്കാൻ ഇത്തരം ബാലിശമായ ഭീഷണികൾക്ക് സാധിക്കില്ലെന്നും അദ്ദേഹം വ്യക്തമാക്കി.
ചരിത്രത്തെക്കുറിച്ച് ഒന്നുമറിയാത്തവരാണ് ഇറാനെതിരെ ഇത്തരം പ്രസ്താവനകൾ നടത്തുന്നതെന്ന് സൈനിക നേതൃത്വം കൂട്ടിചേർത്തു. പശ്ചിമേഷ്യയിൽ യുദ്ധഭീതി നിലനിൽക്കെ ഇരുരാജ്യങ്ങളും തമ്മിലുള്ള ഈ വാക്പോര് അന്താരാഷ്ട്ര തലത്തിൽ വലിയ ആശങ്കയുണ്ടാക്കുന്നുണ്ട്.
Story Summary:
The IRGC has strongly responded to US President Donald Trump’s threat to bomb Iran “back to the Stone Age,” dismissing it as a “Hollywood delusion.” Brigadier General Sayyed Majid Mousavi mocked the US, stating that a nation with only 250 years of history cannot threaten a 6,000-year-old civilization. The tension escalates as the US demands the reopening of the Strait of Hormuz, while Iran warns that American soldiers are being led to their “graveyards.”
