ലാഹോർ: ജയിലിൽ കഴിയുന്ന മുൻ പാകിസ്ഥാൻ പ്രധാനമന്ത്രി ഇമ്രാൻ ഖാന് മോചനത്തിനായി രണ്ട് തവണ ‘ഡീൽ’ വാഗ്ദാനം ചെയ്തിരുന്നതായി പാക് പ്രധാനമന്ത്രി ഷെഹ്ബാസ് ഷെരീഫിന്റെ രാഷ്ട്രീയ ഉപദേശകൻ റാണ സനാഉള്ള വെളിപ്പെടുത്തി (Imran Khan Refused Political Deal). എന്നാൽ ഈ വാഗ്ദാനങ്ങൾ ഖാൻ നിരസിച്ചുവെന്നും സനാഉള്ള അവകാശപ്പെട്ടു.
ഇമ്രാൻ ഖാനുമായി രാഷ്ട്രീയ ധാരണയിലെത്താൻ രണ്ട് ഗൗരവകരമായ ശ്രമങ്ങൾ നടന്നിരുന്നുവെന്നാണ് റാണ സനാഉള്ള പറഞ്ഞത്. ആദ്യത്തേത് 2024 നവംബർ 26-ന് മുൻപായി ഫെഡറൽ ആഭ്യന്തര മന്ത്രി മോഹ്സിൻ നഖ്വിയുടെയും ഖൈബർ പഖ്തുൻഖ്വ മുഖ്യമന്ത്രി അലി അമിൻ ഗന്ദാപൂരിന്റെയും നേതൃത്വത്തിലായിരുന്നു. രണ്ടാമത്തേത് അടുത്തിടെ ചില വിദേശ പ്രതിനിധികൾ വഴിയായിരുന്നു. ആദ്യം ചില വ്യവസ്ഥകൾക്ക് ഖാൻ സമ്മതിച്ചുവെങ്കിലും പിന്നീട് അദ്ദേഹം അതിൽ നിന്ന് പിന്മാറുകയായിരുന്നുവെന്നും സനാഉള്ള ആരോപിച്ചു. ഈ പ്രശ്നത്തിന് രാഷ്ട്രീയ പരിഹാരമാണ് സർക്കാർ ആഗ്രഹിക്കുന്നതെന്നും എന്നാൽ ഖാൻ വഴങ്ങുന്നില്ലെന്നും അദ്ദേഹം കൂട്ടിച്ചേർത്തു.
അതേസമയം, റാണ സനാഉള്ളയുടെ വെളിപ്പെടുത്തലിനെ തള്ളി ഫെഡറൽ ഇൻഫർമേഷൻ മന്ത്രി അതാഉള്ള തരാർ രംഗത്തെത്തി. ഇമ്രാൻ ഖാന് യാതൊരുവിധ ഇളവുകളോ ഡീലോ നൽകുന്നില്ലെന്നും അദ്ദേഹം ഒരു കുറ്റവാളിയാണെന്നും തരാർ വ്യക്തമാക്കി. നിലവിൽ അഡിയാല ജയിലിൽ കഴിയുന്ന ഇമ്രാൻ ഖാന് ഗുരുതരമായ കാഴ്ചശക്തി പ്രശ്നങ്ങളുണ്ടെന്നും വലതുകണ്ണിന്റെ 85 ശതമാനം കാഴ്ചയും നഷ്ടപ്പെട്ടുവെന്നും അദ്ദേഹത്തിന്റെ അഭിഭാഷകൻ കഴിഞ്ഞ ദിവസം വെളിപ്പെടുത്തിയിരുന്നു.
Summary: Rana Sanaullah, a close aide to Pakistan PM Shehbaz Sharif, claimed that jailed former PM Imran Khan was offered two political deals for his release, but he declined them.
