ബെയ്റൂട്ട്: പശ്ചിമേഷ്യയിൽ ഇസ്രായേൽ-ഇറാൻ യുദ്ധം രൂക്ഷമാകുന്നതിനിടെ ലെബനനിലെ ജനങ്ങളോട് വീടൊഴിയാൻ ഇസ്രായേൽ സൈന്യം ഉത്തരവിട്ടു (Hundreds Thousands Flee Lebanon). തെക്കൻ ലെബനനിലും തലസ്ഥാനമായ ബെയ്റൂട്ടിലെ ദഹിയ മേഖലയിലുമുള്ള ലക്ഷക്കണക്കിന് ആളുകളാണ് ഇന്ന് രാവിലെ മുതൽ കൂട്ടപലായനം ആരംഭിച്ചത്. ഹിസ്ബുള്ളയുടെ ശക്തമായ കേന്ദ്രമെന്ന് കരുതപ്പെടുന്ന ദഹിയയിൽ ഏതു നിമിഷവും ശക്തമായ ബോംബാക്രമണം ഉണ്ടാകുമെന്ന മുന്നറിയിപ്പിനെത്തുടർന്ന് ജനങ്ങൾ കയ്യിൽ കിട്ടിയ സാധനങ്ങളുമായി സുരക്ഷിത സ്ഥാനങ്ങളിലേക്ക് നീങ്ങുകയാണ്.
വിശുദ്ധ റംസാൻ മാസത്തിൽ വിശ്വാസികൾ വ്രതമെടുക്കാൻ തയ്യാറെടുക്കുന്നതിനിടെയാണ് ഈ ദുരന്തം വിരുന്നെത്തിയത്. പുലർച്ചെ അത്താഴം കഴിഞ്ഞ് നോമ്പ് നോൽക്കേണ്ട സമയത്ത് കുഞ്ഞുങ്ങളുമായി അഭയസ്ഥാനം തേടി അലയേണ്ടി വരുന്ന ജനങ്ങളുടെ അവസ്ഥ അതീവ ദയനീയമാണ്. 2024-ലെ യുദ്ധത്തിന് ശേഷം ഉണ്ടായ വെടിനിർത്തൽ കരാർ ഇസ്രായേൽ ലംഘിച്ചതായും ഹിസ്ബുള്ള വീണ്ടും സായുധരാകുന്നു എന്നാരോപിച്ചാണ് ആക്രമണം തുടരുന്നതെന്നും അന്താരാഷ്ട്ര നിരീക്ഷകർ ചൂണ്ടിക്കാട്ടുന്നു. ബെയ്റൂട്ടിലെ തെരുവുകളിൽ ഇപ്പോൾ വാഹനങ്ങളുടെയും ജനങ്ങളുടെയും വൻ തിരക്കാണ് അനുഭവപ്പെടുന്നത്.
ഇറാൻ പ്രതിരോധ മന്ത്രി അമീർ നാസിർസാദെയും പരമോന്നത നേതാവ് ആയത്തുള്ള അലി ഖമേനിയും കൊല്ലപ്പെട്ടതായുള്ള റിപ്പോർട്ടുകൾക്ക് പിന്നാലെ ഹിസ്ബുള്ളയും ഇസ്രായേലിന് നേരെ ആക്രമണം കടുപ്പിച്ചിട്ടുണ്ട്. കുവൈത്ത് വിമാനത്താവളത്തിലും ദോഹയിലും ദുബായിലും സ്ഫോടനങ്ങൾ തുടരുന്നതും ലെബനനിലെ ഈ പുതിയ സൈനിക നീക്കവും മേഖലയെ പൂർണ്ണമായ തകർച്ചയിലേക്ക് നയിക്കുമെന്ന് ഐക്യരാഷ്ട്രസഭ മുന്നറിയിപ്പ് നൽകി. ലെബനനിലുള്ള ആയിരക്കണക്കിന് മലയാളി പ്രവാസികൾ ഇതോടെ വലിയ ആശങ്കയിലായിരിക്കുകയാണ്. വിമാന സർവീസുകൾ റദ്ദാക്കിയതോടെ പലർക്കും നാട്ടിലേക്ക് വരാനോ സുരക്ഷിത ഇടങ്ങളിലേക്ക് മാറാനോ കഴിയാത്ത അവസ്ഥയാണ്.
