ബൊഗോട്ട: കൊളംബിയൻ പ്രസിഡന്റ് ഗുസ്താവോ പെട്രോ മയക്കുമരുന്ന് കടത്തുസംഘങ്ങളുമായി ചേർന്ന് പ്രവർത്തിച്ചുവെന്ന ആരോപണത്തിൽ അമേരിക്കൻ പ്രോസിക്യൂട്ടർമാർ അന്വേഷണം ആരംഭിച്ചു (Gustavo Petro under Investigation). 2022-ലെ തന്റെ തിരഞ്ഞെടുപ്പ് പ്രചാരണത്തിനായി മയക്കുമരുന്ന് മാഫിയയിൽ നിന്ന് പെട്രോ പണം കൈപ്പറ്റിയോ എന്നാണ് ന്യൂയോർക്കിലെ ബ്രൂക്ക്ലിൻ, മാൻഹട്ടൻ എന്നിവിടങ്ങളിലെ അറ്റോർണിമാർ പരിശോധിക്കുന്നത്. ‘ന്യൂയോർക്ക് ടൈംസ്’ ആണ് ഈ വാർത്ത പുറത്തുവിട്ടത്.
എന്നാൽ, ഈ ആരോപണങ്ങൾ പെട്രോ ശക്തമായി നിഷേധിച്ചു. “എന്റെ ജീവിതത്തിൽ ഇന്നുവരെ ഒരു മയക്കുമരുന്ന് കടത്തുകാരനുമായി പോലും ഞാൻ സംസാരിച്ചിട്ടില്ല” എന്ന് അദ്ദേഹം എക്സ് പ്ലാറ്റ്ഫോമിൽ കുറിച്ചു. തന്റെ പ്രചാരണ ഫണ്ടിലേക്ക് ബാങ്കർമാരിൽ നിന്നോ മയക്കുമരുന്ന് വ്യാപാരികളിൽ നിന്നോ സംഭാവനകൾ സ്വീകരിക്കരുതെന്ന് കർശന നിർദ്ദേശം നൽകിയിരുന്നതായും അദ്ദേഹം വ്യക്തമാക്കി. കൊളംബിയയിലെ വലതുപക്ഷ പ്രതിപക്ഷം തന്നെ വേട്ടയാടാൻ നടത്തുന്ന നീക്കമാണിതെന്നും അമേരിക്കയിലെ അന്വേഷണം തന്റെ നിരപരാധിത്വം തെളിയിക്കാൻ സഹായിക്കുമെന്നും അദ്ദേഹം കൂട്ടിച്ചേർത്തു.
മെയ് 31-ന് കൊളംബിയയിൽ പ്രസിഡന്റ് തിരഞ്ഞെടുപ്പ് നടക്കാനിരിക്കെ പുറത്തുവന്ന ഈ റിപ്പോർട്ട് രാഷ്ട്രീയ വൃത്തങ്ങളിൽ വലിയ ചർച്ചയായിട്ടുണ്ട്. തിരഞ്ഞെടുപ്പിനെ സ്വാധീനിക്കാനുള്ള അമേരിക്കയുടെ ശ്രമമാണിതെന്ന് ചില സുരക്ഷാ നിരീക്ഷകർ വിലയിരുത്തുന്നു. അമേരിക്കൻ പ്രസിഡന്റ് ഡൊണാൾഡ് ട്രംപും പെട്രോയും തമ്മിൽ നേരത്തെ തന്നെ അസ്വാരസ്യങ്ങൾ നിലനിന്നിരുന്നു. മയക്കുമരുന്ന് കടത്തിനെതിരെ കടുത്ത സൈനിക നടപടികൾ സ്വീകരിക്കുന്ന ട്രംപിന്റെ നയത്തെ പെട്രോ വിമർശിച്ചിരുന്നു. അയൽരാജ്യമായ വെനസ്വേലയുടെ പ്രസിഡന്റ് നിക്കോളാസ് മഡുറോയെ ജനുവരിയിൽ അമേരിക്ക തടവിലാക്കിയതിന് പിന്നാലെ മേഖലയിലെ മറ്റ് ഇടത് നേതാക്കളും ആശങ്കയിലാണ്.
Summary
US prosecutors have opened investigations into Colombian President Gustavo Petro for alleged ties to drug traffickers during his 2022 campaign. Petro has denied all allegations, calling them a smear campaign by the far-right as the country approaches its May 31 presidential election.
