തെക്കുകിഴക്കൻ ബ്രസീലിലെ മിനാസ് ഗെറൈസ് സംസ്ഥാനത്ത് തിങ്കളാഴ്ച മുതൽ ആരംഭിച്ച അതിശക്തമായ മഴയെത്തുടർന്നുണ്ടായ പ്രളയത്തിലും ഉരുൾപൊട്ടലിലും മരിച്ചവരുടെ എണ്ണം 30 ആയി ഉയർന്നു (Brazil Floods 2026). 39 പേരെ ഇനിയും കണ്ടെത്താനുണ്ടെന്നാണ് ഏറ്റവും പുതിയ ഔദ്യോഗിക കണക്കുകൾ സൂചിപ്പിക്കുന്നത്.
ജുയിസ് ഡി ഫോറ (Juiz de Fora), ഉബ (Ubá) എന്നീ നഗരങ്ങളിലാണ് പ്രളയം വൻ നാശം വിതച്ചത്. ഇതിൽ ജുയിസ് ഡി ഫോറയിൽ മാത്രം 18 മരണങ്ങൾ റിപ്പോർട്ട് ചെയ്തു. ജുയിസ് ഡി ഫോറയിൽ ഫെബ്രുവരി മാസത്തിൽ ലഭിക്കേണ്ട ശരാശരി മഴയുടെ ഇരട്ടിയിലധികം വെറും നാല് മണിക്കൂറിനുള്ളിൽ (180 മില്ലിമീറ്റർ) പെയ്തിറങ്ങി. നഗരത്തിന്റെ ചരിത്രത്തിലെ ഏറ്റവും ഈർപ്പമുള്ള ഫെബ്രുവരിയാണിതെന്ന് മേയർ മാർഗരിഡ സലോമോ പറഞ്ഞു.
കുന്നിൻ ചരിവുകളിലെ 12-ഓളം വീടുകൾ വൻ ഉരുൾപൊട്ടലിൽ ഒലിച്ചുപോയി. പാരായ്ബുന നദി (Paraibuna River) കരകവിഞ്ഞൊഴുകിയതിനെത്തുടർന്ന് നഗരത്തിലെ പല തെരുവുകളും തോടുകളായി മാറി.നൂറുകണക്കിന് അഗ്നിശമന സേനാംഗങ്ങളും സന്നദ്ധപ്രവർത്തകരും മണം പിടിക്കാൻ പരിശീലനം ലഭിച്ച നായ്ക്കളുടെ സഹായത്തോടെ അവശിഷ്ടങ്ങൾക്കിടയിൽ തിരച്ചിൽ നടത്തുകയാണ്. പത്തു വയസ്സുള്ള ഒരു കുട്ടിയെ തകർന്ന വീടിനുള്ളിൽ നിന്ന് ജീവനോടെ രക്ഷിക്കാൻ സാധിച്ചത് രക്ഷാപ്രവർത്തകർക്ക് പ്രതീക്ഷ നൽകുന്നു.
ജുയിസ് ഡി ഫോറയിൽ സർക്കാർ ‘അടിയന്തരാവസ്ഥ’ (State of Calamity) പ്രഖ്യാപിച്ചു. ദുരന്തബാധിതർക്ക് എല്ലാവിധ സഹായങ്ങളും ഉറപ്പാക്കുമെന്ന് പ്രസിഡന്റ് ലുല ഡ സിൽവ അറിയിച്ചു.
