മ്യൂണിക്ക്: വിചിത്രമായ കഴിവുകളിലൂടെ ഗിന്നസ് ലോകറെക്കോർഡ് സ്വന്തമാക്കി ഓസ്ട്രിയൻ യുവാവ്. ഒരു മിനിറ്റിനുള്ളിൽ മൂക്കിലൂടെ ഏറ്റവും കൂടുതൽ ബലൂണുകൾ കടത്തി വായിലൂടെ പുറത്തെടുത്താണ് മാൾട്ടെ ഡ്യൂൺസർ എന്ന യുവാവ് ചരിത്രം കുറിച്ചത് (Balloon Nose Trick Guinness World Record). ജർമ്മനിയിലെ മ്യൂണിക്കിൽ വെച്ച് നടന്ന ‘ഡി ഗ്രോസ് ഷോ ഡെർ വെൽട്രെക്കോർഡ്’ (Die große Show der Weltrekorde) എന്ന ടിവി ഷോയ്ക്കിടെയായിരുന്നു ഈ അസാധാരണ പ്രകടനം.
തന്റെ ഈ വിചിത്ര വിദ്യയിലൂടെ ഒരു മിനിറ്റിനുള്ളിൽ 10 തവണ ബലൂണുകൾ മൂക്കിലൂടെ കടത്തി വായിലൂടെ പുറത്തെടുക്കാൻ ഡ്യൂൺസർക്ക് സാധിച്ചു. ഇൻസ്റ്റാഗ്രാമിൽ ‘കിംഗ് ഓഫ് ദ ഫ്രീക്സ്’ എന്ന് സ്വയം വിശേഷിപ്പിക്കുന്ന ഇദ്ദേഹം ഇത്തരം നിരവധി സാഹസിക പ്രകടനങ്ങളിലൂടെ ഇതിനോടകം തന്നെ സോഷ്യൽ മീഡിയയിൽ ശ്രദ്ധേയനാണ്. ഈ റെക്കോർഡ് നേട്ടത്തിനായി പ്രത്യേക തരം ബലൂണുകൾ കണ്ടെത്തുന്നതിനായി താൻ ഏറെ സമയം ചിലവഴിച്ചുവെന്ന് അദ്ദേഹം പറഞ്ഞു. പ്രകടനം സുഗമമാക്കുന്നതിനായി ബലൂണുകളിൽ നേരിയ തോതിൽ എണ്ണ തേച്ചിരുന്നതായും അദ്ദേഹം വെളിപ്പെടുത്തി.
ഗൗരവമേറിയതും എന്നാൽ വിചിത്രവുമായ ഈ സാഹസികതയിലൂടെ ഗിന്നസ് വേൾഡ് റെക്കോർഡ് അധികൃതരെ അത്ഭുതപ്പെടുത്താൻ ഡ്യൂൺസർക്ക് കഴിഞ്ഞു. സുരക്ഷാ മുൻകരുതലുകൾ പാലിച്ചുകൊണ്ടായിരുന്നു ഈ പ്രകടനം നടന്നത്.
