ടെഹ്റാൻ: അമേരിക്കയും ഇസ്രായേലും ഇറാനിൽ നടത്തുന്ന ആക്രമണം 14-ാം ദിവസത്തേക്ക് കടക്കുമ്പോഴും, പലസ്തീൻ ഐക്യദാർഢ്യവുമായി ഇറാനിൽ പതിനായിരങ്ങൾ തെരുവിലിറങ്ങി (Al-Quds Day Rally Tehran Explosions). ടെഹ്റാനിൽ നടന്ന വാർഷിക അൽ-ഖുദ്സ് ദിന റാലിക്കിടെ പ്രതിഷേധക്കാർക്ക് സമീപം ശക്തമായ സ്ഫോടനങ്ങൾ ഉണ്ടായതായി അന്താരാഷ്ട്ര മാധ്യമങ്ങൾ റിപ്പോർട്ട് ചെയ്തു. റമദാനിലെ അവസാന വെള്ളിയാഴ്ചയാണ് ഇറാൻ അന്താരാഷ്ട്ര അൽ-ഖുദ്സ് ദിനമായി ആചരിക്കുന്നത്.
ടെഹ്റാനിലെ പ്രധാന കേന്ദ്രമായ ഫെർദൗസി സ്ക്വയറിൽ പ്രതിഷേധക്കാർ തടിച്ചുകൂടിയ സമയത്താണ് വൻ സ്ഫോടനം ഉണ്ടായത്. ഈ പ്രദേശം ഒഴിയണമെന്ന് ഇസ്രായേൽ മുൻകൂട്ടി മുന്നറിയിപ്പ് നൽകിയിരുന്നതായി റിപ്പോർട്ടുകൾ പറയുന്നു. സ്ഫോടനത്തിന്റെ കൃത്യമായ കാരണം വ്യക്തമല്ലെങ്കിലും, പ്രതിഷേധക്കാർക്ക് തൊട്ടടുത്ത് വ്യോമാക്രമണം നടന്നതായി അൽ ജസീറ റിപ്പോർട്ട് ചെയ്തു. എന്നാൽ നാശനഷ്ടങ്ങളെക്കുറിച്ചോ ആളപായത്തെക്കുറിച്ചോ ഉള്ള വിവരങ്ങൾ ഇതുവരെ പുറത്തുവിട്ടിട്ടില്ല.
യുദ്ധം കൊടുമ്പിരിക്കൊള്ളുമ്പോഴും “ഇസ്രായേലിന് മരണം”, “അമേരിക്കയ്ക്ക് മരണം” എന്നീ മുദ്രാവാക്യങ്ങൾ വിളിച്ചാണ് ജനങ്ങൾ റാലിയിൽ പങ്കെടുത്തത്. ഇറാന്റെ കായിക-യുവജന മന്ത്രിയും റോഡ്സ് മന്ത്രിയും ഉൾപ്പെടെയുള്ള പ്രമുഖർ റാലിയുടെ മുൻനിരയിലുണ്ടായിരുന്നു. ശത്രുക്കളെ നിരാശപ്പെടുത്താൻ കൂടുതൽ ജനങ്ങൾ തെരുവിലിറങ്ങണമെന്ന് പ്രസിഡന്റ് മസൂദ് പെസെഷ്കിയാൻ ആഹ്വാനം ചെയ്തിരുന്നു.
കഴിഞ്ഞ ഒൻപത് മാസത്തിനിടെ രണ്ടാം തവണയാണ് ഇസ്രായേൽ ഇറാനെ നേരിട്ട് ആക്രമിക്കുന്നത്. എന്നാൽ ഇത്തവണത്തെ യുദ്ധത്തിന്റെ വ്യാപ്തി മുൻപത്തേക്കാൾ വളരെ കൂടുതലാണെന്ന് നിരീക്ഷകർ പറയുന്നു. 1979-ലെ ഇസ്ലാമിക വിപ്ലവത്തിന് ശേഷം അയത്തുള്ള ഖൊമേനിയാണ് അൽ-ഖുദ്സ് ദിനാചരണത്തിന് തുടക്കമിട്ടത്. പലസ്തീൻ ജനതയ്ക്കുള്ള പിന്തുണ അറിയിക്കുന്നതിനൊപ്പം ഇറാന്റെ ആഭ്യന്തര കരുത്ത് പ്രകടിപ്പിക്കാനുള്ള വേദിയായും ഈ ദിനം മാറിയിരിക്കുകയാണ്.
Summary: Despite the ongoing war with the U.S. and Israel entering its 14th day, thousands of Iranians gathered in Tehran for the annual Al-Quds Day rally in solidarity with Palestine. Explosions were reported near Ferdowsi Square during the march, shortly after Israel warned civilians to evacuate the area.
