ഹൈദരാബാദ്: യൂട്യൂബറും സയൻസ് വിദ്യാർത്ഥിനിയുമായ ബോണു കൊമാലിയെ (21) ഹൈദരാബാദിലെ വാടക വീട്ടിൽ മരിച്ച നിലയിൽ കണ്ടെത്തി. മരണത്തിന് തൊട്ടുമുമ്പ് കുവൈറ്റിലുള്ള അമ്മയ്ക്ക് “ഐ ലവ് യു സോ മച്ച്” എന്ന് സന്ദേശമയച്ച ശേഷമായിരുന്നു അന്ത്യം.(YouTuber Bonu Komali found dead in Hyderabad after sending message to mother)
വിശാഖപട്ടണം സ്വദേശിയായ കൊമാലി കഴിഞ്ഞ 11 മാസമായി ഹൈദരാബാദിലെ അപ്പാർട്ട്മെന്റിൽ തനിച്ച് താമസിച്ച് ബി.എസ്.സി പഠനം നടത്തുകയായിരുന്നു. തിങ്കളാഴ്ച പുലർച്ചെയാണ് കുവൈറ്റിൽ ജോലി ചെയ്യുന്ന അമ്മ സത്യ വരലക്ഷ്മിക്ക് കൊമാലി സന്ദേശമയച്ചത്. അമ്മയെ ഒരുപാട് സ്നേഹിക്കുന്നു, അനിയനെ നന്നായി നോക്കണം എന്നായിരുന്നു സന്ദേശം. ഇതിന് പിന്നാലെ ഫോൺ സ്വിച്ച് ഓഫ് ആയി.
മകളെ ഫോണിൽ കിട്ടാത്തതിനെ തുടർന്ന് അമ്മ സുഹൃത്തിനെ വിവരമറിയിച്ചു. സുഹൃത്തെത്തി വാതിൽ തകർത്ത് അകത്തുകടന്നപ്പോഴാണ് കൊമാലിയെ മരിച്ച നിലയിൽ കണ്ടെത്തിയത്. പ്രണയബന്ധം തകർന്നതിനെത്തുടർന്നുള്ള മാനസിക വിഷമമാണ് മരണകാരണമെന്ന് പോലീസ് പ്രാഥമികമായി വിലയിരുത്തുന്നു. സഹ യൂട്യൂബറും സോഫ്റ്റ്വെയർ എഞ്ചിനീയറുമായ 27-കാരനുമായി കൊമാലി മൂന്ന് വർഷത്തോളമായി പ്രണയത്തിലായിരുന്നു. ആറ് മാസം മുൻപും കൊമാലി ആത്മഹത്യയ്ക്ക് ശ്രമിച്ചിരുന്നതായി പോലീസ് പറഞ്ഞു.
