തിരുവനന്തപുരം: കേരളത്തിൽ 35 നിയമസഭാ സീറ്റുകൾ ലഭിച്ചാൽ ബിജെപി അധികാരം പിടിക്കുമെന്ന വാദം വീണ്ടും ഉയർത്തി കെ. സുരേന്ദ്രൻ (K Surendran). നാല് സീറ്റുകൾ മാത്രമുള്ള മറ്റത്തൂർ പഞ്ചായത്ത് ബിജെപി ഭരിക്കുന്നത് ചൂണ്ടിക്കാട്ടിയാണ് നിയമസഭയിലും ഇത് സാധ്യമാണെന്ന് അദ്ദേഹം അവകാശപ്പെട്ടത്. തിരുവനന്തപുരത്ത് നടന്ന ഒരു സാഹിത്യോത്സവത്തിൽ സംസാരിക്കുകയായിരുന്നു അദ്ദേഹം.
“നാല് സീറ്റ് കൊണ്ട് ഞങ്ങൾ മറ്റത്തൂർ ഭരിക്കുന്നില്ലേ? അതുപോലെ കേരളവും ഭരിക്കും” എന്ന് അദ്ദേഹം പറഞ്ഞു. കോൺഗ്രസ് വിമതരുടെ പിന്തുണയോടെയാണ് മറ്റത്തൂരിൽ ബിജെപി ഭരണം പിടിച്ചത്. കഴിഞ്ഞ നിയമസഭാ തിരഞ്ഞെടുപ്പ് കാലത്തും ’35 സീറ്റ്’ എന്ന തന്ത്രം സുരേന്ദ്രൻ ഉയർത്തിയിരുന്നുവെങ്കിലും ഒരു സീറ്റിൽ പോലും വിജയിക്കാൻ അന്ന് ബിജെപിക്ക് കഴിഞ്ഞിരുന്നില്ല.
മറ്റത്തൂർ പഞ്ചായത്തിൽ ബിജെപി ഭരണം പിടിച്ചെടുത്തത് ഉത്തരേന്ത്യൻ മോഡൽ രാഷ്ട്രീയ നീക്കങ്ങളിലൂടെയായിരുന്നു. എട്ട് കോൺഗ്രസ് അംഗങ്ങൾ ഒന്നിച്ച് രാജിവെക്കുകയും ബിജെപിയുടെ 4 അംഗങ്ങളുടെ പിന്തുണയോടെ കോൺഗ്രസ് വിമത ടെസി ജോസ് കല്ലറക്കൽ പ്രസിഡന്റാവുകയുമായിരുന്നു. എന്നാൽ പിന്നീട് അനുനയ ചർച്ചകൾക്കൊടുവിൽ കൂറുമാറിയവർ കോൺഗ്രസിലേക്ക് തന്നെ മടങ്ങിയെത്തിയിരുന്നു.
കെ. സുരേന്ദ്രന്റെ ഈ പ്രസ്താവന സോഷ്യൽ മീഡിയയിലും രാഷ്ട്രീയ വൃത്തങ്ങളിലും വലിയ ചർച്ചകൾക്ക് വഴിവെച്ചിട്ടുണ്ട്.
