സാന്റിയാഗോ: ചിലിയിലെ സാന്റിയാഗോയിൽ ലിക്വിഡ് ഗ്യാസ് കൊണ്ടുപോവുകയായിരുന്ന ട്രക്ക് നിയന്ത്രണം വിട്ട് മറിഞ്ഞുണ്ടായ സ്ഫോടനത്തിൽ നാലു പേർ കൊല്ലപ്പെട്ടു (Chile Gas Tanker Explosion). വ്യാഴാഴ്ച ഉച്ചയോടെയാണ് നാടിനെ നടുക്കിയ ഈ അപകടം നടന്നത്. നിയന്ത്രണം നഷ്ടപ്പെട്ട ടാങ്കർ മറിയുകയും നിമിഷങ്ങൾക്കുള്ളിൽ വൻ സ്ഫോടനത്തോടെ തീപിടിക്കുകയുമായിരുന്നുവെന്ന് പോലീസ് അറിയിച്ചു.
അപകടത്തിൽ മരിച്ചവരിൽ ട്രക്ക് ഡ്രൈവറും ഉൾപ്പെടുന്നു. സ്ഫോടനത്തിൽ 17 പേർക്ക് പരിക്കേറ്റു, ഇതിൽ അഞ്ചുപേരുടെ നില അതീവ ഗുരുതരമാണ്. പരിക്കേറ്റ ഒരാളുടെ ശരീരം 100 ശതമാനവും പൊള്ളലേറ്റ നിലയിലാണെന്നും ജീവൻ അപകടത്തിലാണെന്നും മെട്രോപൊളിറ്റൻ റീജിയൻ ഗവർണർ ക്ലോഡിയോ ഒറെഗോ വ്യക്തമാക്കി. സ്ഫോടനത്തിന്റെ ആഘാതത്തിൽ സമീപത്തുണ്ടായിരുന്ന 50-ഓളം വാഹനങ്ങൾക്ക് കേടുപാടുകൾ സംഭവിക്കുകയും മൂന്ന് ബിസിനസ് സ്ഥാപനങ്ങളിലേക്ക് അവശിഷ്ടങ്ങൾ തെറിച്ചുവീഴുകയും ചെയ്തു.
Tragična nesreča v Čilu 🇨🇱, eksplozija vlačilca cisterne z utekočinjenim plinom.https://t.co/gUc7whnesw pic.twitter.com/mSb1pX9TvV
— Schall_abweiser0002 (@Schallabweiser2) February 20, 2026
പ്രാദേശിക ഗ്യാസ് കമ്പനിയായ ‘ഗാസ്കോ’യുമായി ബന്ധപ്പെട്ട ട്രക്കാണ് അപകടത്തിൽപ്പെട്ടത്. സാന്റിയാഗോയിലെ വ്യവസായ മേഖലയ്ക്ക് സമീപമുള്ള റെങ്ക എന്ന സ്ഥലത്താണ് സ്ഫോടനം നടന്നത്. ഏകദേശം 200 മീറ്റർ ചുറ്റളവിൽ സ്ഫോടനത്തിന്റെ പ്രകമ്പനം അനുഭവപ്പെട്ടതായി ഫയർഫോഴ്സ് അറിയിച്ചു. സംഭവത്തിൽ പ്രോസിക്യൂട്ടറുടെ ഓഫീസ് അന്വേഷണം ആരംഭിച്ചിട്ടുണ്ട്. സ്ഫോടനത്തിന്റെ ഭീകരമായ ദൃശ്യങ്ങൾ ഇതിനോടകം സോഷ്യൽ മീഡിയയിൽ പ്രചരിക്കുന്നുണ്ട്. ചിലി പ്രസിഡന്റ് ഗബ്രിയേൽ ബോറിക് അപകടത്തിൽ അനുശോചനം രേഖപ്പെടുത്തുകയും പരിക്കേറ്റവർക്ക് മികച്ച ചികിത്സ ഉറപ്പാക്കാൻ നിർദ്ദേശിക്കുകയും ചെയ്തു.
Summary: At least four people were killed and 17 injured when a liquid gas truck belonging to Gasco overturned and exploded in Santiago, Chile.
