ചണ്ഡീഗഡ്: ഹരിയാനയിലെ പഞ്ച്കുലയിൽ ക്രഷിൽ നിന്ന് ഒരു വയസ്സുകാരനെ തട്ടിക്കൊണ്ടുപോയി ശ്വാസംമുട്ടിച്ച് കൊലപ്പെടുത്തിയ സംഭവത്തിൽ ഓട്ടോ ഡ്രൈവർ അറസ്റ്റിലായി (Panchkula Toddler Murder). പിഞ്ചോർ സ്വദേശിയായ അജയ് എന്നയാളാണ് പിടിയിലായത്. കുട്ടിയുടെ പിതാവാണെന്ന് നടിച്ച് ശനിയാഴ്ച രാവിലെ ക്രഷിൽ നിന്നാണ് ഇയാൾ കുഞ്ഞിനെ കൊണ്ടുപോയത്. തുടർന്ന് ഓട്ടോ വൃത്തിയാക്കാൻ ഉപയോഗിക്കുന്ന തുണി ഉപയോഗിച്ച് കുഞ്ഞിനെ ശ്വാസംമുട്ടിച്ച് കൊലപ്പെടുത്തുകയായിരുന്നു.
കുട്ടിയുടെ അമ്മയുമായി ഇൻസ്റ്റാഗ്രാം വഴിയുള്ള ആറുമാസത്തെ സൗഹൃദമാണ് കൊലപാതകത്തിലേക്ക് നയിച്ചതെന്ന് പോലീസ് പറയുന്നു. ഇവർ തമ്മിലുള്ള കൂടിക്കാഴ്ചകൾക്ക് കുട്ടി ഒരു തടസ്സമാണെന്ന് കരുതിയ അജയ്, കുഞ്ഞിനെ ഒഴിവാക്കാൻ പദ്ധതിയിടുകയായിരുന്നു. നഴ്സറിയിൽ നിന്ന് തട്ടിക്കൊണ്ടുപോയ ശേഷം കൊലപ്പെടുത്തിയ കുഞ്ഞിന്റെ മൃതദേഹം ഒരു ബാഗിലാക്കി സുഖോമാജ്രി ബൈപാസിന് സമീപമുള്ള കലുങ്കിനടിയിൽ ഉപേക്ഷിച്ചു. ശനിയാഴ്ച വൈകുന്നേരത്തോടെയാണ് പോലീസ് മൃതദേഹം കണ്ടെടുത്തത്.
നഴ്സറി അധികൃതരുടെ ഭാഗത്തുനിന്നുണ്ടായ വീഴ്ചയെക്കുറിച്ചും പോലീസ് അന്വേഷണം ആരംഭിച്ചിട്ടുണ്ട്. തിരിച്ചറിയൽ രേഖകൾ പരിശോധിക്കാതെ കുഞ്ഞിനെ അപരിചിതനായ ഒരാൾക്ക് കൈമാറിയത് ഗുരുതരമായ വീഴ്ചയായാണ് കണക്കാക്കുന്നത്. കേസിൽ കുട്ടിയുടെ അമ്മയ്ക്ക് പങ്കുണ്ടോ എന്ന കാര്യവും പരിശോധിച്ചുവരികയാണ്. ഭാരതീയ ന്യായ സംഹിതയിലെ (BNS) കൊലപാതകക്കുറ്റം ചുമത്തി അറസ്റ്റ് ചെയ്ത പ്രതിയെ നാല് ദിവസത്തെ പോലീസ് റിമാൻഡിൽ വിട്ടു.
A one-year-old boy was kidnapped and strangled to death by an auto driver named Ajay in Panchkula, Haryana. The accused posed as the child’s father to pick him up from a creche before murdering him, allegedly because he viewed the child as an obstacle in his relationship with the mother, whom he met on Instagram. The police recovered the body from a culvert and have arrested Ajay under murder charges. Investigations are also focusing on potential negligence by the creche authorities and whether the mother had any involvement.
