മറ്റെല്ലാം ഇറച്ചികളിൽ നിന്നും വ്യത്യസ്തമാണ് പോർക്ക്. നന്നായി വരട്ടിയെടുത്ത പോർക്ക് ഉണ്ടെങ്കിൽ ചോറ് കഴിക്കാൻ മറ്റൊരു കറിയും വേണ്ട. ദോശ, പുട്ട്, അപ്പം തുടങ്ങിയ പലഹാരങ്ങൾക്കൊപ്പവും കഴിക്കാൻ നല്ലൊരു ഐറ്റമാണ് പോർക്ക്. പോർക്ക് വരട്ടി ഉണ്ടാക്കിയാലോ (Pork Varatti).
ആവശ്യമായ ചേരുവകൾ
ഒന്നാമത്തെ ചേരുവകൾ:
പോര്ക്ക് ഇറച്ചി – 1 കിലോഗ്രാം
മഞ്ഞള്പ്പൊടി – കാല് ടീ സ്പൂണ്
കുരുമുളകു പൊടി – ഒരു ടീ സ്പൂണ്
കറിവേപ്പില
ചെറിയ ഉള്ളി – 20 എണ്ണം ചതച്ചത്
ഇഞ്ചി ചതച്ചത് – ഒരു വലിയ കഷ്ണം
വെളുത്തുള്ളി ചതച്ചത്
പച്ച മുളക് – 4 എണ്ണം ചതച്ചത്
സവാള – 1 നീളത്തില് അരിഞ്ഞത്
ഉപ്പ് ആവശ്യത്തിന്
രണ്ടാമത്തെ ചേരുവകൾ
കടുക്
ഇഞ്ചി വെളുത്തുള്ളി പേസ്റ്റ് – 3 ടേബിള് സ്പൂണ്
തേങ്ങാക്കൊത്ത് – കാല് കപ്പ്
സവാള – 2
ഉപ്പ്
മുളകുപൊടി – ഒരു ടീസ്പൂണ്
ഗരം മസാല – ഒരു ടീ സ്പൂണ്
മല്ലിപ്പൊടി – മൂന്ന് ടീസ്പൂണ്
കുരുമുളക് – രണ്ട് ടേബിള് സ്പൂണ്
തയാറാക്കുന്ന വിധം
ഒരു കിലോ പന്നിയിറച്ചി കഴുകിയെടുത്ത് ഒരു ബൗളില് ഇട്ട് അരടീസ്പൂണ് മഞ്ഞള്പ്പൊടി, ഉപ്പ്, രണ്ട് ടേബിള്സ്പൂണ് വെളിച്ചെണ്ണയും ചേര്ത്ത് പുരട്ടി അരമണിക്കൂര് വയ്ക്കുക. ശേഷം നന്നായി കഴുകി വൃത്തിയാക്കി എടുക്കുക. ഇതിലേക്ക് കാല് ടീ സ്പൂണ് മഞ്ഞള്പ്പൊടി, ഒരു ടീ സ്പൂണ് കുരുമുളകുപൊടി, കറിവേപ്പില, ചെറിയ ഉള്ളി 20 എണ്ണം ചതച്ചത്, ഒരു വലിയ കഷ്ണം ഇഞ്ചി ചതച്ചത്, വെളുത്തുള്ളി ചതച്ചത്, പച്ച മുളക് നാലെണ്ണം ചതച്ചത്, ഒരു സവാള നീളത്തില് അരിഞ്ഞത്, ഉപ്പ് എന്നിവ ചേര്ത്ത് നന്നായി കൂട്ടിയോജിപ്പിച്ച് 10 മിനിറ്റ് വയ്ക്കുക. ശേഷം ഇതിനെ ഒരു പാനില് അടച്ചു വച്ച് വെള്ളം ചേര്ക്കാതെ വേവിക്കുക. വെന്തശേഷം ഇതില്നിന്ന് നെയ്യ് മാറ്റിയെടുക്കാവുന്നതാണ്.
മറ്റൊരു പാനില് കടുക് പൊട്ടിച്ച് 3 ടേബിള് സ്പൂണ് ഇഞ്ചി വെളുത്തുള്ളി പേസ്റ്റ്, കാല് കപ്പ് തേങ്ങാക്കൊത്ത്, രണ്ട് സവാള അരിഞ്ഞത്, ഉപ്പ് എന്നിവ ചേര്ത്ത് വഴറ്റുക. ഇതിലേക്ക് ഒരു ടീസ്പൂണ് മുളകുപൊടി, ഒരു ടീ സ്പൂണ് ഗരം മസാല, മൂന്ന് ടീസ്പൂണ് മല്ലിപ്പൊടി, രണ്ട് ടേബിള് സ്പൂണ് കുരുമുളക് എന്നിവ ചേര്ത്ത് നന്നായി വഴറ്റണം. അതിനുശേഷം ഇതിലേക്ക് വേവിച്ചു വച്ചിരിക്കുന്ന പന്നിയിറച്ച് ചേര്ത്ത് നന്നായി യോജിപ്പിക്കുക. ഇറച്ചി വേവിച്ചതിനു ശേഷം മാറ്റിവച്ച നെയ്യ് ആവശ്യമെങ്കിൽ ഇതിലേക്ക് ചേര്ത്ത് കൊടുക്കാം.
