ബെയ്ജിങ്: ബ്രഹ്മപുത്ര നദിയിൽ ലോകത്തിലെ ഏറ്റവും വലിയ അണക്കെട്ട് നിർമിക്കാൻ ചൈന പദ്ധതിയിടുന്നതായി റിപ്പോർട്ട് (China building Dam in Brahmaputra).ബ്രഹ്മപുത്ര നദി ടിബറ്റിലെ കൈലായ പർവതനിരകളിൽ നിന്ന് ഉത്ഭവിച്ച് ഇന്ത്യയിലൂടെയും ,ബംഗ്ലാദേശിലൂടെയും ഒഴുകി ബംഗാൾ ഉൾക്കടലിലാണ് പതിക്കുന്നത്. ലോകത്തിലെ ഏറ്റവും നീളം കൂടിയ നദികളിൽ ഒന്ന് കൂടിയാണ് ബ്രഹ്മപുത്ര നദി. ടിബറ്റിൽ ഈ നദിയെ സാങ്ബോ എന്നാണ് വിളിക്കുന്നത്. ടിബറ്റിനെ നിയന്ത്രിക്കുന്ന ചൈന, ബ്രഹ്മപുത്ര ജലം വരണ്ട പ്രദേശങ്ങളിലേക്ക് തിരിച്ചുവിടാനുള്ള പദ്ധതികൾ ഇതിനകം തന്നെ നടപ്പാക്കാൻ തുടങ്ങിയതായാണ് റിപ്പോർട്ട്.
നിലവിൽ, ബ്രഹ്മപുത്രയ്ക്ക് കുറുകെ ലോകത്തിലെ ഏറ്റവും വലിയ അണക്കെട്ട് നിർമ്മിക്കാനൊരുങ്ങുകയാണ് ചൈന എന്നാണ് റിപ്പോർട്ട്. യാങ്‌സി നദിക്ക് കുറുകെ ചൈനയ്ക്ക് ഇതിനകം ഒരു ഭീമാകാരമായ ത്രീ ഗോർജസ് (മൂന്ന് ഗോർജസ്) അണക്കെട്ടുണ്ട്. ബ്രഹ്മപുത്രയിൽ ഈ അണക്കെട്ടിനേക്കാൾ മൂന്നിരട്ടി വലിപ്പമുള്ള അണക്കെട്ട് നിർമിക്കാനാണ് ചൈന പദ്ധതിയിടുന്നത്. ഇതിലൂടെ ലോകത്തിലെ ഏറ്റവും വലിയ ജലവൈദ്യുത പദ്ധതിയുടെ നടത്തിപ്പും ചൈന ലക്ഷ്യമിടുന്നു.
ഈ ഡാം ഉപയോഗിച്ച് 60,000 മെഗാവാട്ട് വൈദ്യുതി ഉൽപ്പാദിപ്പിക്കാനാണ് ചൈനയുടെ പദ്ധതി. ചൈനയുടെ മൊത്തം വൈദ്യുതി ആവശ്യത്തിൻ്റെ 30 ശതമാനവും ഈ പ്ലാൻ്റിൽ നിന്ന് ഉത്പാദിപ്പിക്കാൻ കഴിയും. പുതിയ അണക്കെട്ട് നിർമിക്കുന്നതിലൂടെ ആഭ്യന്തര സുരക്ഷയും ജലസ്രോതസ്സുകളും പ്രയോജനപ്പെടുത്തുമെന്ന് രാജ്യത്തെ വിദഗ്ധർ പറയുന്നു. അതേസമയം , ബ്രഹ്മപുത്ര നദിയെ ആശ്രയിക്കുന്ന ഇന്ത്യയ്ക്കും ബംഗ്ലാദേശിനും ഈ അണക്കെട്ട് വലിയ തലവേദന സൃഷ്ടിക്കാൻ സാധ്യതയുണ്ട്.