വളരെ എളുപ്പത്തിൽ ഉണ്ടാക്കാവുന്ന മൂന്നു തരം നാടന് പലഹാരങ്ങള്. മലയാളികള്ക്ക് മറക്കാന് കഴിയാത്തതും കഴിക്കാൻ ഇഷ്ടമുള്ളതുമായ മൂന്നു തരം പലഹാരങ്ങള്. കുമ്പിള് അപ്പം, അരിയുണ്ട, കൊഴുക്കട്ട. ഇവ മൂന്നും ഉണ്ടാക്കുന്നത് അരിപ്പൊടിയിലാണ് ആദ്യം കുമ്പിള് അപ്പം എങ്ങനെ ഉണ്ടാക്കാമെന്ന് നോക്കാം. (Traditional Kerala snacks)
ആവശ്യമുള്ള ചേരുവകള്
വയണ ഇല കുമ്പിള് ഉണ്ടാക്കി അതില് മാവു നിറച്ച് ആവിയില് വേവിച്ചെടുക്കുന്ന വിഭവമാണ് കുമ്പിളപ്പം. ചിലയിടങ്ങളിൽ മറ്റ് ഇലകളും കുമ്പിളപ്പം ഉണ്ടാക്കാന് ഉപയോഗിക്കുന്നുണ്ട്. എന്നാൽ വയണ ഇലയുടെ രുചിയും മണവുമാണ് ഈ പലഹാരത്തിന്റെ പ്രത്യേകത. മറ്റു വിഭവങ്ങളില് നിന്നും വ്യത്യസ്തമായി ചക്കപ്പഴമാണ് കുമ്പിളപ്പത്തിന്റെ പ്രധാന ഘടകം.
തയാറാക്കുന്ന വിധം
ചെറു കഷണങ്ങളാക്കിയ ചക്കപ്പഴം ശര്ക്കരയില് വഴറ്റിയെടുക്കുക. അരിപ്പൊടി, തേങ്ങ ചിരകിയത്, ഏലക്കായ പൊടിച്ചത് എന്നിവ വഴറ്റിയ ചക്കയും ചേര്ത്ത് നന്നായി കുഴയ്ക്കുക. വയണ ഇല കുമ്പിള് ആകൃതിയിലാക്കി ഈ കൂട്ട് നിറയ്ക്കുക. എന്നിട്ട് അപ്പച്ചെമ്പില് വേവിച്ചെടുക്കുക.
അരിപ്പൊടിക്ക് പകരം റവയും, ചക്കപ്പഴത്തിനു പകരം വാഴപ്പഴം ഉപയോഗിച്ചും കുമ്പിള് ഉണ്ടാക്കാം. എന്നാലും ചക്കകൊണ്ട് തയാറാക്കുന്ന കുമ്പിളപ്പത്തിനാണ് രുചി കൂടുതല്. അരക്കിലോ അരിപ്പോടിയ്ക്ക് അര മുറി തേങ്ങ, രണ്ടു കപ്പ് നല്ല പഴുത്ത ചക്ക ഇതാണ് കണക്ക്. ചക്ക കൂടിയാലും കുഴപ്പമില്ല.
അടുത്തത് അരിയുണ്ട ഉണ്ടാക്കുന്നത് എങ്ങിനെയെന്ന് നോക്കാം
ആവശ്യമുള്ള സാധനങ്ങള്
പുഴുങ്ങലരി വറുത്ത് പൊടിച്ചത് – രണ്ടു കപ്പ്
തേങ്ങ ചിരകിയത് – രണ്ടു കപ്പ്
ശര്ക്കര പൊടിച്ചത് – 1 1/2 കപ്പ്
ഏലയ്ക്ക അഞ്ച് എണ്ണം- തൊലി കളഞ്ഞ് പൊടിച്ചെടുക്കുക.
തയാറാക്കുന്ന വിധം
പച്ചരി വെള്ളത്തില് കുതിര്ത്ത് പൊടിക്കുക. തേങ്ങ ചിരകിയെടുത്ത് അരിപ്പൊയിടില് ചേര്ത്തിളക്കുക. ഈ മിശ്രിതം ഉരുളിപോലുള്ള പാത്രത്തിലിട്ടു നല്ലവണ്ണം വറുക്കുക. പൊടി മൂത്തുകഴിഞ്ഞാല് തണുക്കാൻ വയ്ക്കുക. ശേഷം ശര്ക്കര പാവ് കാച്ചിയെടുത്ത് ഈ പൊടിയിൽ അരിച്ച് ഒഴിച്ച് നല്ലവണ്ണം ഇളക്കണം. ചൂടാറും മുന്പ് ഉണ്ടയാക്കി ഉരുട്ടുക.
ശര്ക്കര പാവ് ഇളം പാകമാണെങ്കില് അരിയുണ്ട കട്ടികുറഞ്ഞതായിരിക്കും. മൂത്തതാണെങ്കില് കട്ടി കൂടിയതും. കടുപ്പം കൂടിയ അരിയുണ്ടകള് കൂടുതല് കാലം കേടാകാതെ ഇരിക്കും. ജീരകം, ചുക്കുപൊടി, ചെറുനാരങ്ങാനീര് എന്നിവ ചേര്ത്താല് രുചി വര്ധിപ്പിക്കാം.
കൊഴുക്കട്ട എങ്ങനെ ഉണ്ടാക്കാമെന്ന് നോക്കാം
ആവശ്യമുള്ള സാധനങ്ങള്
അരിപ്പൊടി 500 ഗ്രാം
ശര്ക്കര, ഒരുണ്ട
തേങ്ങ ചിരകിയത് അരമുറി
ഏലക്ക പൊടിച്ചത്
ഉപ്പു ആവശ്യത്തിനു
ആദ്യം ശര്ക്കര ഉരുക്കി അരിച്ചെടുക്കുക. ( ശർക്കര ചെറുതായി ചീകിയെടുത്താലും മതിയാകും.) ഇതില് തേങ്ങയും ഏലക്ക പൊടിച്ചതും ചേര്ത്ത് മിക്സ് ചെയ്യുക. അതിനുശേഷം അരിപ്പൊടി ചൂടുവെള്ളത്തില് ഉപ്പു ചേര്ത്ത് കുഴച്ചു ചെറിയ ഉരുളകള് ആക്കി നടുവില് ശര്ക്കര മിക്സ് ഒരു ടിസ്പൂണ് ഇട്ടു ഇത് ഉരുളയാക്കി എടുക്കണം എന്നിട്ട് അപ്പ ചെമ്പില് വച്ച് ആവിയില് പുഴുങ്ങിയെടുക്കണം.
