'ക്ഷമ ആട്ടിൻ സൂപ്പിന്റെ ഗുണം ചെയ്യും' എന്നാണ് പഴമൊഴി. പഴയ കാലങ്ങളിൽ എന്നല്ല ഇന്നും പ്രസവ ശേഷം മരുന്നായും മഴക്കാലങ്ങളിൽ വരുന്ന പനി, ചുമ, കൈ കാൽ വേദന എന്നിവയ്ക്കും ഇത് ഉപയോഗിച്ച് വരുന്നുണ്ട്. ധാരാളം ഗുണങ്ങൾ ഉള്ള ആട്ടിൻ സൂപ്പ് ചെറു തീയിൽ 4-8 മണിക്കൂറോളം വെള്ളത്തിൽ വേവിച്ച് എടുക്കുന്നു. ഇത് ഔഷധമായി ഉപയോഗിക്കുന്നവർ 3, 5, 7 പ്രാവശ്യം ആഴ്ചയിലോ മാസത്തിലോ കുടിക്കണം. ഫ്രിഡ്ജിൽ വെച്ച് ഉപയോഗിക്കുകയാണെങ്കിൽ പിന്നീട് തിളപ്പിക്കരുത്, ചൂടാക്കുക മാത്രമേ ചെയ്യാവൂ. ആട്ടിൻസൂപ്പ് കുടിച്ച ശേഷം 1/2 മണിക്കൂർ നേരത്തേക്ക് വെള്ളം, ഭക്ഷണം എന്നിവ കഴിക്കരുത്. ആട്ടിൻ സൂപ്പ് എങ്ങനെ തയ്യാറാക്കാമെന്ന് നോക്കാം.
ചേരുവകൾ
ആടിന്റെ എല്ലുകൾ – 1 കിലോ
വെള്ളം – 3.5 ലിറ്റർ
വറുത്ത മല്ലി - 1/2 കപ്പ്‌
ജീരകം - 1 ടേബിൾ സ്പൂൺ
കുരുമുളക് - 1/2 കപ്പ്‌
നെയ്യ്
ചെറിയ ഉള്ളി
തയാറാക്കുന്ന വിധം
എല്ലുകൾ കഴുകി വെള്ളം ഒഴിച്ച് വേവിക്കാൻ വെക്കുക. ഇതിലേക്ക് മല്ലി, ജീരകം, കുരുമുളക് പൊടിച്ചതും ചേർക്കുക. നന്നായി തിളപ്പിക്കുക. വെള്ളം പകുതിയോളം ആകുമ്പോൾ തീ കുറച്ച് ഇടുക. വെള്ളം 1.5 ലിറ്റർ ആവുന്നതുവരെ ഇളം തീയിൽ വേവിക്കുക. ചൂട് പോയ ശേഷം അരിച്ചെടുക്കുക. എല്ലുകളെല്ലാം പിഴിഞ്ഞെടുക്കുക.
നെയ്യ് - 2 ടീസ്പൂൺ ( 2 കപ്പ്‌ സൂപ്പിന് )
ഉപ്പ് - ഒരു നുള്ള്
ചെറിയ ഉള്ളി - 5-6 എണ്ണം
നെയ്യ് ചൂടാക്കി ഉള്ളി വഴറ്റി തയ്യാറാക്കി വച്ചിരിക്കുന്ന സൂപ്പിൽ ചേർക്കുക. ഇതിലേക്ക് ഉപ്പും ചേർത്ത് ഇളം ചൂടിൽ കഴിക്കുക.