ക്രിസ്മസിന് പ്രധാനമാണ് കള്ളപ്പവും പാലപ്പവുമൊക്കെ. നല്ല മൊരിഞ്ഞ മയമുള്ള പാലപ്പവും കൂടെ ചിക്കനോ ബീഫോ മപ്പാസും ഒക്കെ ഉണ്ടെങ്കിൽ അടിപൊളിയായി. അരി കുതിർക്കാതെ തന്നെ അടിപൊളി പാലപ്പം തയാറാക്കാം. ഒരുമണിക്കൂർ കൊണ്ട് പൂ പോലത്തെ പാലപ്പം ഉണ്ടാക്കാം.
ചേരുവകൾ
അരിപ്പൊടി- 2 കപ്പ്
വെള്ള അവൽ 1കപ്പ്
തേങ്ങ ചിരകിയത് 1/2 കപ്പ്
യീസ്റ്റ് 1ടേബിൾ സ്പൂൺ
ഉപ്പു 1ടേബിൾ സ്പൂൺ
പഞ്ചസാര 2 ടേബിൾ സ്പൂൺ
വെള്ളം ആവശ്യത്തിന്
തയാറാക്കുന്നവിധം
ആദ്യം മിക്സിയുടെ ജാറിലേക്ക് 2 കപ്പ് അരിപ്പൊടിയും 1 കപ്പ് വെള്ള അവൽ കുതിർത്തതും, അര കപ്പ് തേങ്ങ ചിരകിയതും, 1ടേബിൾ സ്പൂൺ യീസ്റ്റും, 1 ടേബിൾ സ്പൂൺ ഉപ്പും, 2 ടേബിൾ സ്പൂൺ പഞ്ചസാരയും ചേർത്ത് നന്നായി അരച്ച് എടുക്കാം.
അരച്ച് വച്ച മാവ് ഒരു പാത്രത്തിൽ ഒഴിച്ച് 1 മണിക്കൂർ പുളിച്ചു പൊങ്ങാനായി വയ്ക്കാം. പുളിച്ച് പൊങ്ങിയമാവ് നന്നായി ഇളക്കി യോജിപ്പിച്ച് ആവശ്യാനുസരണം അപ്പച്ചട്ടിയിൽ ഒഴിച്ച് രുചികരമായ അപ്പം ചുട്ടെടുക്കാം.