ഒരു വടക്കൻ കേരള വിഭവമാണ് എറച്ചി ചോറ്. ബിരിയാണിയിൽ നിന്ന് വ്യത്യസ്തമായി സാധാരണ വേവിച്ച അരി ഉപയോഗിച്ചാണ് ഇത് ഉണ്ടാക്കുന്നത്. കോഴിക്കോട് പട്ടണത്തിൽ ഈ വിഭവം വളരെ ജനപ്രിയമാണ്. കേരളത്തിലെ വിവിധ സ്ഥലങ്ങളിൽ എറച്ചി ചോറു ഉണ്ടാക്കുന്നുണ്ടെങ്കിലും, ഇത് സവിശേഷമാണ്. എങ്ങനെ തയ്യാറാക്കാമെന്ന് നോക്കാം.
ചേരുവകൾ
മസാലയ്ക്ക്
½ കപ്പ് തേങ്ങ ചിരകിയത്
1 ടീസ്പൂൺ പെരുംജീരകം
1 ചെറിയ ഉള്ളി
അരിയ്ക്ക്
1 ടീസ്പൂൺ നെയ്യ്
5 ഉലുവ
5 ചെറിയ ഉള്ളി
1 കപ്പ് തേങ്ങാപ്പാൽ
1 കപ്പ് വെള്ളം
1 ടീസ്പൂൺ ഉപ്പ്
1 കപ്പ് പൊന്നി അല്ലെങ്കിൽ കുറുവ അരി
ചിക്കന്
1 ടീസ്പൂൺ എണ്ണ
3 പച്ചമുളക് + 1 ടീസ്പൂൺ വെളുത്തുള്ളി ചതച്ചത് + 1 ടീസ്പൂൺ ഇഞ്ചി (ചതച്ചത്)
2 ഉള്ളി
3 ടീസ്പൂൺ മല്ലിപ്പൊടി
½ ടീസ്പൂൺ കാശ്മീരി മുളകുപൊടി
½ ടീസ്പൂൺ മഞ്ഞൾപ്പൊടി
1 ടീസ്പൂൺ ഗരം മസാല
1 ടീസ്പൂൺ ചിക്കൻ മസാല
½ ടീസ്പൂൺ ജീരകം
1 തക്കാളി
ആവശ്യത്തിന് ഉപ്പ്
തയ്യാറാക്കുന്ന വിധം
തേങ്ങയും പെരുംജീരകം, ഉള്ളി എന്നിവ ചേർത്ത് പേസ്റ്റ് ആക്കുക.
ഒരു പ്രഷർ കുക്കറിൽ നെയ്യ് ചൂടാക്കി ഉലുവ, ഉള്ളി എന്നിവ വറുക്കുക. ഇതിലേക്ക് തേങ്ങാപ്പാലും നേരത്തെ തയ്യാറാക്കിയ തേങ്ങാ പേസ്റ്റും ചേർക്കുക. 1 കപ്പ് വെള്ളവും ഉപ്പും ചേർത്ത് കഴുകിയ അരിയും ഇട്ടു വേവിക്കുക.
ചിക്കൻ തയ്യാറാക്കാൻ
ഒരു പാനിൽ എണ്ണ ചൂടാക്കുക. പച്ചമുളക്, ഇഞ്ചി, വെളുത്തുള്ളി ഉള്ളി എന്നിവ വഴറ്റുക. ഇതിലേക്ക് മല്ലിപ്പൊടി, കാശ്മീരി മുളകുപൊടി, മഞ്ഞൾപ്പൊടി, ഗരം മസാല, ചിക്കൻ മസാല, ജീരകം എന്നിവ ചേർക്കുക
പൊടികളുടെ പച്ച മണം മാറുന്നത് വരെ വഴറ്റുക. ശേഷം തക്കാളി ചേർക്കുക. നന്നായി ഇളക്കി മൂടി വെച്ച് വേവിക്കുക. കുറച്ച് സമയത്തിന് ശേഷം, ചിക്കൻ കഷണങ്ങൾ, അരിഞ്ഞ മല്ലിയില, പുതിനയില, കറിവേപ്പില, ½ കപ്പ് വെള്ളം എന്നിവ ചേർക്കുക. മൂടി വെച്ച് വീണ്ടും വേവിക്കുക.
നന്നായി വേവിച്ച ശേഷം ചിക്കൻ കഷണങ്ങൾ പുറത്തെടുക്കുക. ശേഷം വേവിച്ച ചോറ് ഗ്രേവിയിലേക്ക് ചേർക്കുക. നന്നായി ഇളക്കുക. ചിക്കൻ കഷണങ്ങൾ അതിന് മുകളിൽ വയ്ക്കുക.
തേങ്ങ ചട്ണി, പപ്പടം, അച്ചാർ എന്നിവയ്ക്കൊപ്പം എറച്ചി ചോറു കഴിക്കാം.