മീനും ഇറച്ചിയുമൊന്നും ഇല്ലെങ്കിലും ഉള്ളിത്തീയൽ മാത്രം മതി ചോറുണ്ണാൻ. എത്ര കഴിച്ചാലും മതി വരാത്ത രുചിയിൽ ഉള്ളി തീയൽ തയ്യാറാക്കാം.
ചേരുവകൾ
തേങ്ങ - ഒന്നര കപ്പ് തിരുമ്മിയത്
ചുവന്നുള്ളി - 1 കപ്പ്
പച്ചമുളക് - 3 കീറിയത്
മുളകുപൊടി - 2 ടീസ്പൂൺ
മല്ലിപ്പൊടി - 1 ടീസ്പൂൺ
മഞ്ഞൾപ്പൊടി - 1/4 ടീസ്പൂൺ
ഉലുവാപ്പൊടി - 2 നുള്ള്
പുളി - നെല്ലിക്കാ വലുപ്പത്തിൽ
കറിവേപ്പില - 2 തണ്ട്
വെളിച്ചെണ്ണ - 2 ടീസ്പൂൺ
വെള്ളം - 2 കപ്പ്
ഉപ്പ് - ആവശ്യത്തിന്
തയാറാക്കുന്ന വിധം
ഒരു ബൗളിൽ പുളി കാൽ കപ്പ് വെള്ളം ഒഴിച്ച് പിഴിഞ്ഞ് മാറ്റി വയ്ക്കുക.
ഒരു ഫ്രൈയിങ് പാനിൽ തേങ്ങ, മൂന്ന് ചുവന്നുള്ളി അരിഞ്ഞത്, ഒരു തണ്ട് കറിവേപ്പില എന്നിവ ചേർത്ത് ബ്രൗൺ കളർ ആകുന്നത് വരെ വറുത്തെടുക്കുക. ഇത് തണുത്തതിനുശേഷം മിക്സിയുടെ ജാറിൽ ഇട്ട് വെള്ളം ചേർക്കാതെ നന്നായി അരച്ചെടുക്കണം.
ചീനച്ചട്ടി വെച്ച് രണ്ട് ടീസ്പൂൺ വെളിച്ചെണ്ണ ചൂടാക്കി കടുക് ഇട്ട് പൊട്ടിക്കുക. ശേഷം ഒരു കപ്പ് ചുവന്നുള്ളി അരിഞ്ഞത്, പച്ചമുളക്, കറിവേപ്പില, ഉപ്പ് എന്നിവ ചേർത്ത് രണ്ട് മിനിറ്റ് വഴറ്റി എടുക്കുക . ശേഷം തേങ്ങ അരച്ചതും പുളി പിഴിഞ്ഞതും അവിശ്യത്തിന് വെള്ളവും ചേർത്ത് കറി കുറുകി വരുന്നത് വരെ തിളപ്പിക്കുക. എണ്ണ തെളിഞ്ഞ് വരുമ്പോൾ തീ ഓഫ് ചെയ്യുക. സ്വാദിഷ്ടമായ ഉള്ളി തീയൽ തയ്യാർ.