ചായക്കൊപ്പം എന്തേലും കഴിക്കണമെന്നത് എല്ലാവരുടേയും ഒരു ശീലമാണ്. മിക്സ്ചർ കൊറിക്കാൻ ഇഷ്ടമില്ലാത്തവരായി ആരും ഉണ്ടാകില്ല. ഇന്ന് ചായയോടൊപ്പം കൊറിക്കാൻ നല്ലൊന്നാന്തരം ചക്ക മിക്സ്ചർ തയാറാക്കിയാലോ...
ആവശ്യമായ സാധനങ്ങൾ
1. ചക്കച്ചുള കട്ടിയായി അരച്ചെടുത്തത് – 1 കപ്പ്
2. ചക്കക്കുരു പൊടി – അര കപ്പ്
3. കടലമാവ് – അര കപ്പ്
4. വറുത്ത അരിപ്പൊടി – കാൽ കപ്പ്
പിരിയൻ (കശ്മീരി) മുളകുപൊടി – 1 ടേബിൾ സ്പൂൺ
മുളകു പൊടി – ഒന്നര ടേബിൾ സ്പൂൺ
മഞ്ഞൾപ്പൊടി – അര ടീ സ്പൂൺ
കായംപൊടി – 1 ടീ സ്പൂൺ
നിലക്കടല – 150 ഗ്രാം
പൊട്ടുകടല – 100 ഗ്രാം
വറ്റൽ മുളക് – 8 എണ്ണം
ആവശ്യത്തിനു കറിവേപ്പില
വെള്ളുത്തുള്ളി ചതച്ചത് – 8 അല്ലി
പൊടിയുപ്പ് ആവശ്യത്തിന്
വെളിച്ചെണ്ണ ആവശ്യത്തിന്
കുറച്ചു ചക്കച്ചകിണി
എങ്ങനെ തയാറാക്കാമെന്ന് നോക്കാം
1 മുതൽ 4 വരെ ഉള്ള ചേരുവകൾ, ഒരു ടേബിൾ സ്പൂൺ കാശ്മീരി മുളക് പൊടി, ഒരു ടേബിൾ സ്പൂൺ മുളകുപൊടി, അര ടീ സ്പൂൺ കായം പൊടി, അര ടീസ്പൂൺ മഞ്ഞൾപ്പൊടി, പൊടിയുപ്പ്, 2 സ്പൂൺ വെളിച്ചെണ്ണ എന്നിവ ചേർത്ത് ചപ്പാത്തിക്കു കുഴയ്ക്കുന്നതു പോലെ കുഴച്ചെടുക്കുക. ഇതിന്റെ മുക്കാൽ ഭാഗം സേവ ഉണ്ടക്കാനും കാൽഭാഗം ഗൂന്തി ഉണ്ടാക്കാനും എടുക്കണം. ഗൂന്തി ഉണ്ടാക്കാൻ എടുത്തതിൽ അൽപ്പം വെള്ളം ചേർത്ത് അരിപ്പക്കയിലിന്റെ (കണ്ണാപ്പ) സുഷിരത്തിൽ കൂടി വീഴുന്ന പരുവത്തിലാക്കണം.
വെളിച്ചെണ്ണ ചുടാക്കുക. നൂലപ്പം ഉണ്ടാക്കുന്നതു പോലെ ഒന്നാമത്തെ കൂട്ട് സേവ നാഴിയിൽ പിഴിഞ്ഞ് വെളിച്ചെണ്ണയിലേക്ക് ഇട്ടു വറുത്തു കോരുക. ശേഷം കണ്ണപ്പയിൽ കൂടി ഗൂന്തി ഉണ്ടാക്കേണ്ട കൂട്ട് എണ്ണയിലേക്ക് ഒഴിച്ച്, ഇത് നന്നായി മൊരിഞ്ഞു വരുമ്പോൾ കോരിയെടുക്കാം. അതിനു ശേഷം നിലക്കടല, പൊട്ടുകടല, വെളുത്തുള്ളി, വറ്റൽമുളക്, ചക്കച്ചകിണി, കറിവേപ്പില എന്നിവ ഓരോന്നായി വറുത്തു കോരിയെടുക്കുക.
വറുത്തു കോരി വച്ച കടല, കറിവേപ്പില, വറ്റൽമുളക്, ചക്കച്ചകിണി, വെളുത്തുള്ളി, ഗൂന്തി എന്നിവ പരന്ന പാത്രത്തിലേക്ക് എടുക്കുക. വറുത്തെടുത്ത സേവ കൊള്ളിക്കഷണത്തിന്റെ പരുവത്തിൽ പൊടിച്ചു ചേർക്കുക. ഇതിനു മുകളിൽ ആവശ്യത്തിനു മുളക്പൊടി, അര ടീ സ്പൂൺ കായംപോടി, ആവശ്യത്തിന് ഉപ്പ് എന്നിവ ചേർത്തു നന്നായി ഇളക്കിയെടുക്കുക. ചക്ക മിക്സ്ചർ റെഡി.